Флорида штатының губернаторы Рон ДеСантис сәрсенбі күні 2024 жылы Америка Құрама Штаттарының президенттігіне Республикалық партиядан үміткер ретінде қатысатынын ресми түрде мәлімдеді.

ДеСантис АҚШ Федералдық сайлау комиссиясына өтініш тапсырған.

44 жастағы ДеСантис 2019 жылдан бері Флорида штатының губернаторы қызметін атқарып келеді. Бұған дейін ол 2013-2018 жылдар аралығында осы штаттан АҚШ Конгресі Өкілдер палатасының мүшесі болған. Ол республикашыл кандидаттардың арасында бұрынғы президент Дональд Трамптың ең байыпты қарсыласы болып саналады.

ДеСантис республикашылдар арасында өте танымал. Ол Йель және Гарвард университеттерін бітірген және білімі бойынша заңгер. 2004-2019 жылдары АҚШ Әскери-теңіз күштерінде қызмет етті.