Вакцина олиш коронавируснинг “дельта” штаммини юқтирган беморда касалликнинг оғир кечиши ва ўлим хавфининг олдини олади, деб баёнот берди Жаҳон соғлиқни сақлаш ташкилотининг бош илмий ходими Сумья Сваминатан онлайн брифингда.

“Вакцина “дельта” варианти билан оғриган беморда касаллик оғир кечишининг ва ўлим хавфининг олдини олиши, мутлақо аниқ”, - дея таъкидлади у.

Аввалроқ ЖССТ раҳбари Тедрос Адханом Гебрейесус “дельта” штаммининг тарқалиш суръати  халқаро ҳамжамият кўраётган чора-тадбирларни ҳам ортда қолдираётганини таъкидлаган эди. "Ҳамма мамлакатларда касалликнинг кенг тарқалиши ва ўлимнинг кўплиги айнан  эмлаш даражаси паст бўлган ҳудудларда кузатилмоқда", — деди у.

Коронавируснинг дельта-штамми  — COVID-19ни келтириб чиқарувчи вариантларнинг бири ҳисобланади. У илк бор Ҳиндистонда аниқланган эди. Ушбу вариант бошқаларидан ўзининг қисқа инкубацион даври ва инсон организмига кучли таъсир этиши билан фарқ қилади.

Жаҳон соғлиқни сақлаш ташкилоти коронавируснинг тўртта мутациясини қайд этганини маълум қилган. Улар: альфа (британча), бета (жанубийафриканча), гамма (бразилияча) ва дельта (ҳиндча) штаммлар.