16-20 may kunlari Toshkent va Buxoro shaharlarida “Deklaratsiyalar muloqoti” xalqaro forumi bo‘lib o‘tadi.
Tadbir O‘zbekiston Respublikasi Prezidenti huzuridagi Strategik va mintaqalararo tadqiqotlar instituti hamda AQSH ning Global jalb qilish instituti tomonidan tashkil etilmoqda.
Tadbirda o‘nga yaqin davlatlar, jumladan AQSH, Angliya, Avstriya, Saudiya Arabistoni Qirolligi, Indoneziya, Nigeriya, Gana kabi mamlakatlarning 30 dan ortiq taniqli ilohiyotshunoslari, diniy ulamolari va rasmiy mutasaddi vakillari ishtirok etdi.
Forum doirasida 16-17 may kunlari Toshkentda ko‘p millatli jamiyatda konfessiyalararo muloqotni rivojlantirish sohasida tajriba almashish, diniy erkinlik masalalarida qonun ustuvorligini ta’minlash, turli din vakillari o‘rtasida o‘zaro ishonch va hurmatni mustahkamlash bo‘yicha ilg‘or amaliyotlar bilan tanishish yuzasidan ilmiy-amaliy seminarlar o‘tkaziladi.
18 may kuni forum ishtirokchilari uchun Samarqand shahrining diqqatga sazovor joylariga tashrifni o‘z ichiga olgan tanishuv sayohatini tashkil etish ko‘zda tutilgan.
19 mayda Buxoro shahrida “Deklaratsiyalar muloqoti” forumining asosiy tadbiri bo‘lib o‘tadi. Unda ilmiy-amaliy seminarlar sarhisob qilinadi, e’tiqod erkinligi va dinlararo muloqotni ta’minlash masalalari bo‘yicha fikr almashiladi hamda kelgusidagi hamkorlik istiqbollari belgilanadi.
Tadbir doirasida shuningdek, diniy bag‘rikenglik, e’tiqod erkinligi g‘oyalarini xalqaro darajada qaror toptirish maqsadida 2016-2020 yillardaqabul qilingan Marokash, Makka, Jakarta, Potomak, Punto-del-Esteda deklaratsiyalarining taqdimoti o‘tkazilib, ularning mazmun-mohiyati muhokama qilinishi rejalashtirilgan.
Forum yakuni bo‘yicha “Buxoro deklaratsiyasi” qabul qilinadi.Unda O‘zbekiston tajribasidan kelib chiqib, jahon hamjamiyati bilan dunyoda ma’rifat va diniy bag‘rikenglik tamoyillarini qaror toptirish, shuningdek, turli dinlar o‘rtasidagi muloqotni kuchaytirishga bo‘lgan da’vat ifodalanadi.
O‘zA