“ZARAFSHAN GOLDEN GROUP” kompaniyasi dunyoda o‘z o‘rni va obro‘siga ega bo‘lgan Turkiyaning “DEDEMAN Hotels & Resorts International” kompaniyasi bilan o‘zaro hamkorlikni yo‘lga qo‘ygan holda Toshkent shahrida qad rostlagan mehmonxonaning “DEDEMAN” brendi ostida faoliyatini boshlashi haqida kelishuvga erishgan edi.

1966-yilda asos solingan “DEDEMAN” mehmonxonalarining xizmatlari o‘rta sinf va hashamatli segmentlarda mavjud. Kompaniya portfeliga hashamatli besh yulduzli mehmonxonalar, oilaviy dam olish va biznes uchun mo‘ljallangan 30 dan ortiq mehmonxona kiradi.

“ZARAFSHAN GOLDEN GROUP” kompaniyasi axborot xizmatining ma’lum qilishicha, ikki tomonlama o‘tkazilgan muzokaralar natijasida Navoiy shahri va Karmana tumanida joylashgan “ZARAFSHAN GRAND HOTEL” mehmonxonalar tarmog‘i ham mazkur brend ostida faoliyat yuritishi yuzasidan shartnoma imzolandi.

O‘zaro shartnoma imzolash marosimi munosabati bilan Istanbul shahrida tashkil etilgan anjumanda kompaniyalar asoschilari, rahbarlari va yuqori martabali mehmonlar ishtirok etishdi.

Mazkur brend mehmonxonalarida mehmonlar uchun ideal muhit yaratilgan. Bu yerda ishbilarmonlar va sayyohlar uchun shinam xonalardan tashqari, ko‘p tarmoqli konferensiya zallari, restoran, sog‘lomlashtirish majmualari va fitnes klublar xizmatlari ham taklif etiladi.

A.Bo‘riyev, O‘zA muxbiri