Пойтахтимиздаги “Ренессанс” кино уйида Ўзбекистон Республикаси Маданият вазирлиги ҳузуридаги Кинематография агентлиги, Ўзбекистон Киноарбоблари ижодий уюшмаси, Ўзбекистон Миллий кинематографияни ривожлантириш маркази ҳамда Ўзбекистон давлат санъат ва маданият институти, Бутунроссия давлат кинематография институтининг Тошкент филиали ҳамкорлигида “Ўзбек киноси – янги нигоҳ” кино ойлиги доирасидаги “Дебют” талаба-ёшлар кинофестивали бўлиб ўтмоқда.

“Янги Ўзбекистон – тинчлик, маърифат, тараққиёт” шиори остида бўлиб ўтаётган ушбу кинофестиваль истеъдодли  киноижодкорларни қўллаб-қувватлаш, маҳоратли талаба ёшларни аниқлаш, уларни рағбатлантириш миллий кино санъати вакиллари билан ҳамкорликда кинематография соҳасини ривожлантириш, ёшлар ҳамда миллий киноиндустрия вакиллари билан бирга  қўшма кино лойиҳалари яратишни кенгайтириш, ушбу соҳада илмий тадқиқот изланишларини амалга ошириш орқали соҳани ривожлантиришни мақсад қилган. Шунингдек, миллий кино санъати орқали бой тарихимиз ва бетакрор маданиятимизни дунёга кенг тарғиб этиш кўзда тутилган.  

 Кинофестиваль ғолиблари  қуйидаги  йўналишлар бўйича статуэтка ва эсдалик совғалари билан мукофотланади:  

1.Энг яхши эркак роли;  

2.Энг яхши аёл роли;  

3.Энг яхши сценарий;  

4.Энг яхши анимацион фильм;  

5.Энг яхши ҳужжатли фильм;  

6.Энг яхши овоз режиссёри;  

7.Энг яхши операторлик иши;  

8.Энг яхши режиссёрлик иши;  

9.Энг яхши фильм;  

10.Энг яхши мақола.  

Ғолиблар 21 декабрь куни эълон қилинади.  

Н.Усмонова,  

ЎзА