Дүниежүзілік денсаулық сақтау ұйымы халықаралық сапарлар үшін туристерден коронавирусқа қарсы екпе алуды талап етпеуге шақырды.

Ұйымның Төтенше жағдайлар жөніндегі комитеті отырысының қорытындысы бойынша вакцинацияға қойылатын талап қандай да бір мемлекет аумағына кірудің жалғыз шарты бола алмайды. Осы себепті ДДСҰ саяхатшылардан вакцина алған болуы шарт екенін дәлелдеуді талап етпеуді сұраған.

ДДСҰ сарапшылары мұндай шешімді бірқатар елдерде вакцинация деңгейі әлі де төмен екендігімен негіздеді. Дүниежүзілік денсаулық сақтау ұйымының мәліметі бойынша, табысы жоғары елдер 100 адамға 133 дозаны пайдаланса, табысы төмен елдерде бұл көрсеткіш небәрі 4 дозаны құрайды. 

Мәлімдемеде елдердің халықаралық жолаушылар тасымалына тәуекел тұрғысынан қарауы керек, яғни қажет болған жағдайда рейстер санын көбейту немесе азайту, ПТР-тест тапсыру немесе карантин талабын енгізу керектігі айтылған.