Президентимизнинг Германияга ташрифи Покистон матбуотида кенг ёритилди. Хусусан, “Islamabad Post” газетаси, “Centreline”, “Pakistan in the World”, “Diplomatic Insight” журналлари, “Diplomatic News Agency - DNA”, “Diplomatic News pk.blog”, “Daily Big Digit”, “Global News Pakistan”, “The Gulf Observer” каби етакчи босма ва электрон нашрларда мазкур олий даражали учрашув тафсилотига алоҳида жой ажратилган.

Федерал канцлер Олаф Шольц билан учрашув шарҳланаркан, икки давлат ўртасидаги товар айирбошлаш ва қўшма лойиҳалар сони икки баробар ортгани, Германиядан Ўзбекистонга инвестиция миқдори 5,5 миллиард долларга етгани, шундан 4 миллиард доллари сўнгги 6 йилда жалб қилингани урғуланган.
Ташриф доирасида ўтказилган қўшма бизнес-форум ҳам муносиб баҳоланган.
Нашрлар Покистон жамоатчилигини Ўзбекистон ва Германия ўртасидаги кўп қиррали ҳамкорлик натижаси билан таништирар экан, ташриф доирасида иқтисодиёт, савдо, молия, таълим, фан ва инновация соҳаларида 16 та ҳукуматлар ва идоралар аро ҳужжат имзоланганига эътибор қаратади.
Таъкидланишича, Германия томони шу кунларда Берлин шаҳрида Ўзбекистоннинг маданий меросига бағишлаб очилган ноёб кўргазмани ҳам эътироф этган.
Мамлакатимизда немис тилини ўрганишга қизиқиш ортаётгани мамнуният билан қайд этилиб, Германия ҳукумати бу борада мамлакатимиз ҳудудларига техник кўмак кўрсатиши бўйича келишиб олингани ҳам қаламга олинган.

ЎзА