Давлат хизматчиларининг бошқарувда етакчилик ва проактивлик кўникмаларини ривожлантиришга қаратилган семинар ташкил этилди. Унда давлат органлари ва ташкилотларида фаолият юритаётган раҳбар кадрлар иштирок этди.

Латвия Марказий молия ва шартномалар агентлиги ва Германия халқаро ҳамкорлик жамияти (GIZ)нинг “Самарали бошқарув” дастури кўмагида амалга оширилаётган “Ўзбекистон давлат бошқаруви салоҳиятини оширишга кўмаклашиш” лойиҳаси доирасида ташкил этилган тадбирда иштирокчилар барқарор ривожланиш стратегиясини ишлаб чиқиш, самарадорликни ошириш жараёнлари, жамоада самарали ишлаш ва етакчилик кўникмаларини яхшилаш ҳамда низоларни бошқариш усуллари бўйича билим ва амалий кўникмаларга эга бўлди.

Жараёнларда кейc-стади, интерактив муҳокамалар, симуляция ва ривожланган мамлакатлар тажрибасига асосланган амалий машғулотлардан фойдаланилди. Бу эса иштирокчиларнинг назарий билимларини амалиёт билан уйғунлаштиришга хизмат қилди.

Семинарда фаол иштирок этган давлат хизматчилари учун жорий йилнинг октябрь ойида Латвияда стажировка дастури ташкил этилади. Ўзбекистонлик давлат хизматчилари бошқарувдаги илғор тажрибалар билан яқиндан танишиш имкониятига эга бўлади.

Н.Абдураимова,

ЎзА