Тошкент давлат транспорт университети буюртмачилигида 1219,3 миллион сўмлик давлат хариди амалга оширилган.

Унда иштирок этган икки нафар тадбиркорнинг барча ҳужжатлари харид комиссияси томонидан фойдаланилган компьютернинг IP-манзили орқали электрон платформага юкланганлиги аниқланди.

Оқиқбатда “Давлат харидлари тўғрисида”ги қонунда назарда тутилган рақобат ва холислик принципи бузилган. Манфаатлар тўқнашувига йўл қўйилган.

Бундан ташқари, қонундаги давлат харидлари жараёнидаги чекловлар талаблари бузилган ва бошқа қонунбузилиш ҳолатларига ҳам йўл қўйилган.

Коррупцияга қарши курашиш агентлиги мазкур ҳолатлар бўйича буюртмачига харид комиссиясининг баённомасини бекор қилиш тўғрисида тақдимнома киритган.

Тўпланган ҳужжатлар қонуний чора кўриш учун Бош прокуратура ҳузуридаги Иқтисодий жиноятларга қарши курашиш департаментига юборилди.

Бундан ташқари, ҳолат бўйича хизмат текшируви ўтказиш учун Транспорт вазирлигига сўровнома киритилди.

Агентлик ахборот хизматидан маълум қилишларича,  тақдимномага биноан университет томонидан ўтказилган харид комиссиясининг баённомаси бекор қилинди.

 Н.АБДУРАИМОВА, ЎзА