Энергетика соҳасини барқарор ривожлантириш, замонавий технологияларни жорий этиш ва экологик хавфсизликни таъминлаш масалалари йирик инфратузилма лойиҳаларини амалга оширишда муҳим аҳамият касб этади.

Айниқса, атом электр станцияси қурилиши каби стратегик аҳамиятга эга ташаббуслар атроф-муҳитга таъсирини чуқур ўрганиш ва давлат экологик экспертизасидан пухта ўтказишни талаб қилади. Шу мақсадда Давлат экологик экспертиза марказида навбатдаги ишчи йиғилиш ташкил этилди.  

Тадбирда “Ўзатом” агентлиги ҳамда атом электр станцияси қурилиши дирекцияси вакиллари иштирок этди. Учрашув давомида лойиҳа ҳужжатларини давлат экологик экспертизасидан ўтказишда инобатга олиниши лозим бўлган долзарб ишчи масалалар муҳокама қилинди.  

Марказ мутахассислари тақдим этилаётган материалларни тайёрлаш ва расмийлаштиришнинг айрим жиҳатларига эътибор қаратиб, уларнинг тўлиқлиги, асосланганлиги ҳамда белгиланган талабларга мувофиқлигини таъминлаш зарурлигини таъкидлади. Шунингдек, тақдим этилаётган ҳужжатлар сифатини ошириш, ҳисоб-китобларни аниқлаштириш ва айрим бўлимларни янада батафсил ишлаб чиқиш бўйича тавсиялар берилди.  

Йиғилиш иштирокчилари лойиҳа буюртмачиси ҳамда эксперт органи ўртасида конструктив ҳамкорликнинг муҳимлигини қайд этиб, бу давлат экологик экспертизасидан сифатли ва ўз вақтида ўтишни таъминлашда муҳим омил эканини айтиб ўтди.  

Ишчи учрашув ишбилармонлик ва конструктив руҳда ўтди ҳамда амалдаги экологик меъёр ва стандартларни инобатга олган ҳолда экспертиза жараёнларини такомиллаштиришга қаратилди. 

Муҳайё Тошқораева, ЎзА