Амалдаги тартибларга кўра, ўхшаши республикамизда ишлаб чиқарилмайдиган технологик асбоб-ускуналарини импорт қилиш божхона божи ва қўшилган қиймат солиғидан озод этилган.

Саноат тармоқларида ишлаб чиқариш ва инвестициялар ҳажмини ошириш ҳамда импорт қилинаётган технологик асбоб-ускуналар учун божхона имтиёзлари бериш механизмини такомиллаштириш мақсадида жорий этилган мазкур имтиёзни суиистеъмол қилаётган “уддабуронлар” ҳам учраб турибди.  

Тошкент шаҳар божхона бошқармасининг “Аркбулоқ” ташқи иқтисодий фаолият божхона постида навбатдаги божхона қонунбузилиши ҳолатига чек қўйилди. Унга кўра, хориждан келтирилган ва мазкур божхона постига “эркин муомалага чиқариш” божхона режимига расмийлаштириш учун тақдим этилган совутиш асбоб-ускуналари белгиланган тартибда божхона кўригидан ўтказилди.  

Божхона юк декларациясида алоҳида товар кодлари билан таснифланган мазкур товарлар яхлит товар хусусиятига эга эканлиги, яъни бир бутун товар деб таснифланиши аниқланди ва божхона расмийлаштирувида қўлланилган товарларга нисбатан қўлланилган божхона имтиёзлари бекор қилинди.  

Натижада, давлат бюджетига салкам 140 миллион сўмлик божхона тўловларининг ундирилмай қолиши олди олинди. Қиймати 700 миллион сўмлик совутиш ускуналари вақтинча сақловга олиниб, ҳозирда ҳолат юзасидан текширув ва суриштирув ҳаракатлари олиб борилмоқда.  

ЎзА