Наманган вилояти Поп туманидаги Ғурумсарой қишлоғининг Тошкент йўли ёқаси дашт қисмида айни кунларда улкан бунёдкорлик ишлари амалга оширилмоқда.
Ҳудуд келгусида Қамчиқ довонига энг яқин шаҳар бўлади. Ер майдони катта бўлган бу жойда коммуникация-муҳандислик ишлари пухта олиб борилаётган бўлиб, бу кенг кўламли бунёдкорлик ишларига муҳим пойдевор бўлади.
Ҳозирга қадар хусусий сектор томонидан қурилаётган 120 хонадонли, бешта беш қаватли турар-жой биносининг учтаси деярли битди. Тўртинчисида ғишт териш давом этмоқда. Бешинчисида эса ер ишлари тугаган.
[gallery-4322]
“Қишлоқ қурилиш инвест” компанияси томонидан қурилаётган 5 та беш қаватли, ҳар бири йигирма хўжаликка мўлжалланган турар-жой иншоотларининг ҳам томи ёпилди. Объектда сўнгги пардоз ишлари бажарилмоқда.
– Ишлар охирги босқичда, - дейди “Поп дизайн қурилиш” компанияси бошқарувчиси Бобур Арзамов. – 150 та уста-қурувчи, учта кран, 15 та техника бунёдкорлик ишларига жалб этилган. Иш икки сменада давом этяпти. Айни пайтда биринчи қаватнинг пардозлаш ишлари якунланиш арафасида.
Ҳотам МАМАДАЛИЕВ (сурат), ЎзА