Қазақстандық футболшылар Еуропа-2024 чемпионатының іріктеуінде Дания құрамасын жеңгені үшін қаржылай сыйақы алатын болды.

Turkystan.kz сайтының хабарлауынша, бұл хабарды құраманың бас бапкері Магомед Адиев мәлім еткен.

«Қаржылай сыйақыға келетін болсақ, бізге белгіленген сыйақы мөлшері бар. Алайда футболшылар үшін бұл жеңістің өзі – қандай да бір ақшадан қымбат. Себебі біздің команда үшін алдымен халықаралық сарапшылардың, әсіресе жанкүйерлеріміздің қолдауы мен берген бағасы маңызды», – деді футболдан Қазақстан құрамасының бас бапкері Магомед Адиев.

Еске сала кетейік, футболдан 2024 жылғы Еуропа чемпионатының іріктеу сатысында H тобында Қазақстан құрамасы Данияны 3:2 есебінде ұтқан болатын.