Suriya hukumati va Druz kuchlari mamlakat janubidagi Suvayda shahrida o‘tgan yilgi qonli to‘qnashuvdan so‘ng ilk bor mahbuslarni almashdi. Iyul oyida yuz bergan mazhablararo zo‘ravonlikda yuzlab odam halok bo‘lgan, keng qamrovli o‘t ochishni to‘xtatish kelishuvi esa nizoni vaqtincha jilovlagan edi. Ushbu muzofot hanuz markaziy hokimiyat nazoratidan chetda.

Poytaxt yaqinidagi Adra markaziy qamoqxonasidan 61 nafar druz ozod etildi, evaziga 25 nafar hukumat xodimi qaytarildi. Mazkur amaliyot “International Committee of the Red Cross” vositachiligida o‘tkazildi. Tashkilot vakillari endi yo‘qolganlar taqdiri va gumanitar masala yuzasidan muloqot davom etishiga umid bildirgan.

Rasmiylar muvaffaqiyatli o‘tganini tasdiqlagan mahbuslar almashinuviga AQSHdagi “Tim Ballard Foundation” jamg‘armasi ham ko‘maklashgani aytilmoqda.

Suvaydada o‘tgan yoz druz jangchilari va sunniy beduin qabilalari o‘rtasida keskin to‘qnashuv boshlangan. Vaziyatni bartaraf etish uchun hududga hukumat kuchlari yuborilgach, ziddiyat yanada chuqurlashgan. Mojaro ortidan o‘nlab druz fuqarolari hibsga olingan, ayrimlari hanuz “ehtiyot chorasi” o‘laroq, qamoqda saqlanyapti.

Musulmon Ziyo, O‘zA