9 октябрда Американинг Флорида штати ғарбий соҳилларига ёпирилган "Милтон" тўфони ўзи билан 70 метр/сония тезликдаги шамол ва сув тошқинлари келтириб чиқарадиган кучли ёмғирлар билан бирга торнадо ҳам олиб келди. Қутқарувчилар сув босган ва вайрон бўлган янгидан янги жойларни текширишни бошлагани сайин қурбонлар сони ортиб бормоқда.

Сўнгги маълумотларга кўра, қурбонлар сони 16 кишини ташкил этмоқда. Тўфон 125 га яқин уйни вайрон қилган ва электр таъминотида кенг миқёсда узилишларга сабаб бўлди, 2,6 миллиондан ортиқ одам электр энергиясиз қолди. Табиий офат арафасида 5 миллиондан ортиқ одам эвакуация қилинганди.

Флоридани қамраб олган “Милтон” тўфонидан кўрилган зарар тахминий ҳисоб-китобларга кўра 50 миллиард долларга баҳоланмоқда.

Флорида Губернаторнинг сўзларига кўра, 10 октябр оқшомига қадар табиий офат ҳудудидан 340 киши ва 49 уй жониворлари қутқариб олинди. Флориданинг табиий офат арафасида ўз уйларини вақтинча тарк этган аҳолисига қайтишга шошилмаслик тавсия қилинган.

Электр узатиш линияларидаги беҳисоб узилишлар туфайли Флорида бўйлаб жами 3 млн бино ҳамон токсиз қолмоқда, айрим аҳоли яшаш манзилларида эса — ичимлик сув ҳам йўқ.

Fitch Ratings рейтингига кўра, Флорида аҳолисининг суғурталанган мол-мулкига “Милтон” тўфони оқибатида етказилган зарар 30 миллиард доллардан 50 миллиард долларгача бўлган. Бу 2022 йилда тахминан худди шу йўналиш бўйлаб ўтган “Иан” тўфони келтирган зарардан кейинги энг катта зарардир (60 миллиард доллар).

CNN таъкидлашича, Fitch Ratings баҳоси суғурталанмаган мулкка етказилган зарарни ҳисобга олмайди, бу ҳам жуда катта бўлиши мумкин.

Қайд этилишича, сентябрь ойида Флорида штатида содир бўлган “Ҳелен” тўфонига келсак, суғурталанмаган мулкка етказилган зарар суғурталанган мулкка етказилган зарардан кўпроқ бўлган. Бунга Флориданинг ўша пайтдаги энг кўп жабрланган ҳудудлари аҳолиси орасида суғурта йўқлиги сабаб бўлган.

<iframe width="853" height="480" src="https://www.youtube.com/embed/sEskMuCBmUw" title="Dahshatli “Milton” toʻfoni" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Охирги 48 соат ичида ўн миллионлаб галлон бензин ва дизель ёқилғиси олиб кетаётган камида етти йирик танкер Жанубий Флорида томон йўл олгани хабар қилинган. Бу “Милтон” тўфони сабаб бўлган талабнинг энг юқори чўққисида тугаган ёқилғи қуйиш шохобчаларида ёқилғи захираларини тиклашга ёрдам беради.

М.Турдалиева, А.Аҳмедов (видео), ЎзА