Сурхондарё вилояти Шўрчи туманидаги Ибн Сино маҳалласида яшайдиган Муниса Пардаева Низомий номидаги Тошкент давлат педагогика университетининг 2-босқич талабаси. У спортнинг каноэда эшкак эшиш тури билан шуғулланиб, қатор мусобақаларда ғолиб бўлган. Ўтган йилнинг 19-22 октябрь кунлари спортнинг Пара каноэда эшкак эшиш тури бўйича ўтказилган “Ўзбекистон чемпионати”да иштирок этиб, Осиё ўйинларида қатнашиш йўлланмасини қўлга киритди.

Шу куни қувончини яширолмаган Муниса Фотима момога қўнғироқ қилиб, “бувижон, мени табрикланг, мусобақада яна ғолиб бўлдим. Энди Осиё чемпионатида иштирок этаман. Бувижон олимпиада мусобақасида қатнашиш йўлланмасини олишим учун дуода бўлинг”, деди ҳаяжон билан. 

Набирасининг қўнғироқдек овозини эшитган Фотима холанинг кўзлари ёшланди. Айвонда урчуқ йигириб ўтирган онахон неварасининг бахту камолини, орзулари рўёбга чиқишини сўраб, дуога қўл очди.

Иккинчи гуруҳ ногирони бор Муниса ўз устида ишлашни, доимо ҳаракатда, изланишда бўлишни хуш кўради. У ҳеч қачон изланишдан, меҳнат қилишдан чўчимайди.

– Аниқ мақсад сари интилиб, албатта орзуларимни амалга ошираман, – дейди Муниса Пардаева. – Спортнинг пара каноэда эшкак эшиш тури бўйича паралимпиядада ғолибликни қўлга киритиб, дадам фахрланадиган қиз бўлишни истайман. Бу орзуларимни амалга ошириш учун тинмай ҳаракат қиламан.

Жисмонан имконияти чекланган бўлишига қарамай, ўз вақтида имтиёзлардан самарали фойдаланаётган Муниса Пардаева келгусида инклюзив таълим ривожига ўз ҳиссасини қўшишни мақсад қилиб олган. 

– Университетда дефектология йўналиши сурдопедагогика тармоғи бўйича таҳсил оляпман, – дейди Муниса Пардаева. – Кар ёки заиф эшитувчи болаларни махсус ўқитиш ва тарбиялаш масалалари бўйича янги замонавий методларни ишлаб чиқишда устозларим билан бирга изланиш олиб боряпман. Жумладан, психологик ривожланиш, ўқув фанларини ўқитиш, талаффузни ўргатиш ва “лаб билан ўқиш” меҳнатига ўргатиш, тарбиявий ишлар методикалари орқали кар ва заиф эшитувчи болаларнинг жамиятдаги ўрнини топишга кўмаклашишни мақсад қилганман.

Улуғ мақсадлар, эзгу амаллар билан спорт ва илм-фанда бирдек олға интилаётган сурхонлик талаба-қизнинг беғубор орзуси ҳамда изланишлари рўёбга чиқишига тилакдошмиз.

Нилуфар Бозорова, ЎзА мухбири