Тошкент вилоятининг Қибрай туманидаги оилавий поликлиникага Европа Иттифоқининг Ўзбекистондаги элчиси, Германия, Франция, Италия, Руминия ва Латвиянинг мамлакатимиздаги фавқулодда ва мухтор элчилари, ЮНИСEФ ва ЖССТнинг Ўзбекистондаги ваколатхоналари раҳбарлари ташриф буюриб, "COVID-19"га қарши вакцина билан эмлаш жараёнларини кузатди.

– Ҳамма хавфсизликда бўлмагунча ҳеч ким хавфсиз бўлмайди, – дейди Европа Иттифоқининг Ўзбекистондаги элчиси Шарлотт Адриан. – Шу боис, "COVID-19" пандемиясига қарши самарали курашда глобал ҳамкорлик ва бирдамлик муҳим аҳамиятга эга. Европа Иттифоқи COVAX дастурининг энг йирик донорларидан бири бўлиб, ҳеч ким эътибордан четда қолмаслигига ишонч ҳосил қилиш учун кўп томонлама чора-тадбирларда етакчилик қилмоқда.  

COVAX дастурига молиявий ҳисса қўшишдан ташқари Европа Иттифоқига аъзо давлатлар Ўзбекистонга индивидуал равишда 882 мингдан ортиқ доза "COVID-19"га қарши  вакцинани тақдим этди. Бу вакциналар COVAXнинг барча иштирокчиларига вакциналарни тарқатишнинг биринчи босқичида 20 фоизли қамровга эришишга ёрдам беради.  

– Бугунги кунга қадар Ўзбекистонда 22 миллион 721 минг дозадан ортиқ коронавирус инфекциясига қарши вакцина қўлланилди, – дейди Санитария-эпидемиологик осойишталик ва жамоат саломатлиги хизмати бошлиғи Баҳодир Юсупалиев. – Биз "COVID-19"га қарши курашда кўрсатилган ёрдам учун миннатдормиз. Фақат умумий саъй-ҳаракатлар билан касаллик тарқалишини тўхтатиб, аҳолини ҳимоя қила оламиз.  

Вакцинаторлар ва эпидемиологларнинг тинимсиз саъй-ҳаракати туфайли "COVID-19"га қарши вакцина билан республикада вакцина олиши лозим бўлган аҳолининг 50 фоиздан кўпроғи камида битта дозада эмланган. Бироқ эмланиши лозим бўлган аҳолининг атиги 20 фоизи "COVID-19"га қарши тўлиқ эмланган. Вакциналар қамровини ошириш учун мамлакатга кўпроқ  вакциналар зарур.  

– Вакциналардан тенг равишда фойдаланиш имкониятини таъминлаш узлуксиз мажбурият, биргаликдаги саъй-ҳаракатлар ва глобал бирдамликни талаб қилади, – дейди ЮНИCEФнинг Ўзбекистондаги ваколатхонаси раҳбари Мунир Мамедзаде. – Европа Иттифоқи ва унга аъзо давлатлар ва бошқа ҳамкорларнинг COVAX дастури доирасида  вакциналарни етказиш бўйича беғараз ёрдамлари ва катта молиявий ҳиссаси туфайли биз Ўзбекистонда бундай ҳамжиҳатликнинг гувоҳи бўлдик. COVAX дастури ҳамкорлари ҳамма жойда "COVID-19"га қарши вакциналардан  адолатли фойдаланишни таъминлаш учун икки баробар ҳаракат қилиш муҳимлигини эслатишни давом эттирмоқдалар.

Таъкидланганидек, юртимизда "COVID-19"га қарши вакцинация ва эмланиш миқёсини кенгайтиришни қўллаб-қувватлаш учун яна кўп ишлар қилиш керак. Ҳукумат ва халқаро ҳамжамият "COVID-19" билан курашиш учун вакциналарни сафарбар қилар экан, жамоаларнинг қўрқув ва эмлаш бўйича иккиланишини бартараф этиш орқали вакциналардан фойдаланишга сафарбар этилиши ҳам жуда муҳим. Вакциналарга бўлган талабни кучайтириш ва эмланиш борасидаги иккиланишга олиб келадиган нотўғри маълумотлар ва қарашларни бартараф этиш учун жамоалар, шу жумладан, ижтимоий тармоқлар ва жамоатчилик орқали сафарбар қилиш ЮНИCEФнинг миллий ва халқаро ҳамкорлар билан ҳамкорлигининг устувор йўналишларидан бири бўлиб қолади.

Моҳигул Қосимова, ЎзА