Вакцина ишлаб чиқариш суръати тобора ошиб бораётгани ҳисобга олинса коронавирус пандемияси кейинги йил кузда тугаши мумкин, деди Американинг Moderna фармацевтика компанияси бош директори Стефан Бансель.

"Агар ишлаб чиқариш қувватининг кейинги олти ойда жадал суръатда кенгайиб бораётганини ҳисобга оладиган бўлсак, келаси йилнинг ўрталарига бориб Ер юзидаги барча одамни эмлашга етадиган даражада вакцина тайёр бўлади", - деди Бансель Швейцариянинг Neue Zürcher Zeitung газетасига интервью берган чоғда.

Унинг таъкидлашича, ким вакцина олишдан бош тортса, у коронавирусга қайта чалинади, чунки ҳозир дунёда "дельта" штамми устунлик қилмоқда. 2022 йилнинг иккинчи ярмида инсоният ўзининг одатий ҳаётига қайта оладими, деб берилган саволга Moderna директори бир йилдан кейин мумкин бўлади, деди.