Айни кунларда бутун дунёни ларзага солган ва “тўхташ”га мажбур қилган янги турдаги коронавирус пандемияси кун сайин янгидан янги рақамлар билан инсониятга ғулғула солмоқда.

Қўрқинчли статистика

Бугунги кунга келиб коронавирус деярли бутун дунёни қамраб олди, “етакчилик” аллақачон Хитойдан бошқа мамлакатларга ўтди.

2 апрель ҳолатига кўра вирус юқтирганлар сони бўйича АҚШ биринчи ўринни (215 мингдан ортиқ), Италия иккинчи ўринни (110 минг 574) ҳамда Испания учинчи ўринни (110 минг 238 киши) “эгаллаган”.

Европа қитъаси бўйича Италия ва Испанияда аҳвол ҳамон жиддий. Охирги 24 соат мобайнида Италияда 4 минг 700 дан ортиқ бемор аниқланган, 727 киши ҳалок бўлган. Ўлим сони бўйича Испания нафақат Европа, балки дунёда етакчилик қилмоқда. 1 апрелнинг ўзида мамлакатда 8 минг 100 дан ортиқ касаллик аниқланиб, 950 киши вафот этган.

Испания соғлиқни сақлаш вазирлиги маълумотига кўра, шу кунгача мамлакатда 10 мингдан зиёд киши коронавирусдан ўлган. Шу кеча-кундузда мамлакат шифохоналарида 4 минг 96 киши даволаниб чиққан. Жами 26 минг 743 нафар киши соғайиб уйига қайтган.

Мулоқотсеварлик испанлар “бошига бало” бўлди

Дунё халқлар маданияти, турмуш тарзига қизиқувчилар Европанинг бошқа мамлакатларига қараганда итальян ва испанларнинг қувноқ, қизиққон, одамохун эканини яхши билади. Оддий овқатланиш тарзи ҳам бошқа европаликларга ўхшамайдиган испанлар кўчаларда, гавжум жойлардаги кафе ва емакхоналарда кўпчилик бўлиб, дўстлар даврасида овқатланишни хуш кўришади. Бу икки мамлакатда одамларнинг соатлаб гаплашиб ўтиришини, сайр қилишини, сўзлашганда бир-бирини тез-тез қучоқлаб қўйишини кузатиш қийин эмас.

Ҳазилнинг вақти эмас...

Ҳар нарсадан кулги, ҳазил-мутойиба, хурсандчилик ахтарадиган испанлар карантиннинг илк кунларида турли челленжлар уюштирди. Яъни маълум бир соатда балконларга чиқиб қўшиқ айтиш, қарсак чалиб қийқириш, “коронавирусни енгамиз“ деб қичқиришга берилди... 

Ҳатто шаҳар полицияси карантинда ўтирганлар кўнглини кўтариш учун кўчаларга келиб рақсга тушгани, одамларнинг ўзлари иштирокидаги ҳазиломуз видеолар ижтимоий тармоқларни “портлатди”.

Аммо бугунга келиб тақдир ана шу қувноқ, мусиқа-ю рақс шайдоси бўлган халқни ҳам жиддий қилиб қўйди, қўрқув тилларни “музлатди“.

Энди одамлар ижтимоий тармоқлар орқали ҳукуматга мурожаат қилиб, Германия ва Жанубий Корея тажрибасини қўллаган ҳолда коронавирусга одамларни оммавий текширишни талаб қилишмоқда.

Карантин чоралари шафқатсиз

Испаниянинг йирик мегаполислари Мадрид ва Каталония ҳамон инфекция ўчоғи бўлиб қолмоқда. Карантин тартиби эса ўта қаттиқ, ҳеч кимга шафқат қилинмаяпти. Айниқса, Барселонада жазо кучайтирилган. Карантин қоидаларини бузганларга олтмиш минг еврогача жаримага тортиш ёки 4 йилгача озодликдан маҳрум қилиш жазоси мавжуд.

Ижтимоий тармоқларда “Испания ҳукумати жойлашган Гран Виа кўчаси, мамлакатнинг энг гавжум гўшалари ҳувуллаб қолган. Машиналар қатновига буткул чекланган. Кўчаларда онда-сонда одам учрайди. Пиёдалар айнан қаерга кетаётгани кўрсатилган “йўл варақаси”ни тўлдирибгина кўчага чиқиши мумкин. Бу ҳам ўта зарур ҳолларда дорихона ёки дўконга чиқувчилар учун”, деган изоҳлар қолдирилмоқда.

Вирус туфайли ишсизлик муаммоси пайдо бўлди

COVID-19 билан курашилар экан, асосий мақсад инфекция тарқалишини тўхтатиш, одамлар ҳаётини сақлаб қолиш бўлиб турибди. Аммо бу вирус осонликча чекинади, дегани эмас. 

Испания меҳнат вазирлиги маълумотига кўра, “тождор вирус” март ойи охиригача қарийб 834 минг иш ўрни йўқотилишига, ишсизлар сони ортишига сабаб бўлган. Бу мамлакат тарихидаги энг катта кўрсаткич ҳисобланади. Март ойининг ўзида жами 302 мингдан зиёд киши ишсизлик компенсациясини олиш учун мурожаат қилган.

Давлат бандлик хизмати март ойида ариза топширганлар билан қўшиб ҳисоблаганда мамлакатда жами 3,54 миллион ишсиз пайдо бўлганини таъкидламоқда.

Коронавирус туфайли юзага келган ишсизлик муаммоси, айниқса, қурилиш, меҳмонхона бизнеси, хизмат кўрсатиш, таълим, транспорт ва умумий овқатланиш соҳаларига тўғри келмоқда.

Меҳнат вазирлиги COVID-19га қарши курашиш мақсадида 258 мингдан зиёд киши вақтинчалик иш билан таъминлангани ҳам қайд этган.

Автоном ҳудудлар бўйича энг кўп ишсизлик Андалусия, Канариас, Mурсия ҳамда Валенсияда вужудга келган.

Бугунги кунга қадар Испанияда энг кучли ишсизлик 2009 йилга тўғри келиб, ўша вақтда 198 мингдан ортиқ киши иш ўрнини йўқотган эди.