Жапония үкіметі COVID-19-ға қарсы жүргізіліп жатқан күрес аясында Өзбекстанға AstraZeneca вакцинасының 200 мыңнан астам дозасын беріп, ол COVAX бағдарламасы арқылы ЮНИСЕФ-пен серіктестікте жеткізілді.

«Жапония Өзбекстанның COVID-19-ға қарсы күресудегі күш-жігерін, соның ішінде заманауи медициналық жабдықтар мен жеке қорғаныс құралдарымен қамтамасыз етуді, сондай-ақ халықтың осал топтарына көмек көрсетуді әрқашан қолдайды. Осы уақытқа дейін Өзбекстандағы COVID-19 бен күресу үшін жалпы сомасы 10 миллион доллардан астам қаржы бөлдік. Бүгін мен Жапонияның Өзбекстан халқын бағалы вакциналармен қамтамасыз ететін елдер тобына қосылғанын хабарлаудан өте қуаныштымын», - деді Жапонияның Өзбекстандағы елшісі Ёшинори Фудзияма.

Сондай-ақ ол бұл көмек Өзбекстан халқының салауатты өмір салтын қалыптастыруға және дипломатиялық қарым-қатынастардың 30 жылдығын атап өтетін екі ел арасындағы достықты одан әрі нығайтуға ықпал ететініне сенім білдірген.

COVAX бағдарламасы бойынша ЮНИСЕФ 2022 жылдың ортасына қарай COVID-ке қарсы вакциналардың тағы 24,6 миллион дозасын жеткізуді жоспарлап отыр, делінген ЮНИСЕФ хабарында.