“Ўзбек давлат цирки” давлат муассасаси жорий йилнинг 17-22 февраль кунлари Испаниянинг Жирона шаҳрида бўлиб ўтган “Золотой слон” Х Халқаро цирк санъати фестивалида иштирок этди.

Маданият вазирлиги маълумотига кўра, фестиваль доирасида Россия, Украина, Беларусь, Ўзбекистон, Қозоғистон, АҚШ, Канада, Перу, Хитой, Испания каби 10 дан ортиқ давлатдан 94 нафар етакчи цирк артистлари 24 та ижодий чиқишларини намойиш этди. 

“Ўзбек давлат цирки” давлат муассасасининг цирк артистлари Рустам ва Камила Хаметовлар, Николай ва Никита Евдокимовлар, А.Халимон, М.Азизов, А.Казаковлар “Канат” деб номланган чиқишлари билан иштирок этди. Конкурс дастурининг ёпиқ овоз бериш натижаларига кўра улар 4-ўринни эгаллаб, фестиваль дипломини қўлга киритди. 

“Ўзбек давлат цирки” давлат муассасаси ходимларининг Испанияга сафари унумли бўлгани шубҳасиз. Гастроль давомида дунёнинг бир қатор етакчи цирк муассасалари билан ўзаро музокаралар олиб бориб, ижодий ҳамкорликка келишилди. 

ЎзА