Интернет қызметін пайдаланушылар саны жыл сайын артып келе жатқандықтан, оның тұрақты әрі сапалы жұмыс істеуін қамтамасыз ету бүгінде басты міндеттердің біріне айналды.

Өмірдің барлық салаларындағы өсім мен даму деңгейі цифрлық технологияларға тікелей байланысты болғандықтан, жоғары жылдамдықтағы интернет пен заманауи инфрақұрылымға деген сұраныс та арта түсуде. Осы бағытта халықаралық серіктестік орнату – ел экономикасы мен әлеуметтік саласының серпінді дамуына жаңа мүмкіндік ашады.

Осы мақсатта Өзбекстан Республикасының Цифрлық технологиялар министрі Шерзод Шерматов АҚШ-тың Amazon Kuiper компаниясының өкілдерімен кездесу өткізді. Әңгіме барысында тараптар цифрлық инфрақұрылымды жетілдіру, кең жолақты интернет қызметтерін дамыту және жасанды жер серігі арқылы байланыс орнату мүмкіндіктерін талқылады.

Кездесу қорытындысы бойынша Цифрлық технологиялар министрлігі мен Amazon Kuiper Commercial Services LLC арасында өзара түсіністік туралы меморандумға қол қойылды. Құжатта «Project Kuiper» спутниктік желісі арқылы Өзбекстан аумағында жоғары жылдамдықтағы интернет қызметін жолға қою және телекоммуникация инфрақұрылымын жаңғырту бағытындағы ынтымақтастық тетіктері айқындалды.

Amazon Kuiper – Amazon корпорациясының төменгі Жер орбитасындағы (LEO) спутниктер арқылы бүкіл әлемге жоғары жылдамдықтағы интернет қызметін жеткізуді мақсат еткен стратегиялық жобасы. Бұл серіктестік Өзбекстанның цифрлық трансформациясын жеделдетіп, шалғай аймақтардағы байланыс сапасын айтарлықтай жақсартуға жол ашады. Сонымен қатар, меморандумның жүзеге асуы нәтижесінде ауылдық және алыс аймақтарда да сапалы интернетке қолжетімділік кеңейіп, білім беру, медицина және бизнес салаларында жаңа цифрлық мүмкіндіктер пайда болмақ.