Мамлакатимизда Президентимиз ташаббуси билан Учинчи Ренессанс даврига пойдевор қўйилишидан кўзда тутилган мақсад, энг аввало, мустақил фикрловчи, замонавий илм-фан чўққиларини забт этишга қодир буюк келажак соҳибларини камол топтиришдан иборат.

Шу маънода, Наманган вилоятининг Чуст туманидаги 52-Давлат ихтисослаштирилган умумтаълим мактабининг 11-синфида ўқиётган билимдон ва зукко ёшлардан бири Сардор Аъложоновнинг муддатидан аввал талабаликка қабул қилиниб, бирданига тўққизта олий таълим муассасасида таҳсил олиш имкониятига эга бўлгани буюк истиқбол сари қўйилган улкан қадамлар натижасидир.

Бу истеъдод соҳиби бошланғич синфда ўқиётган кезларидаёқ инглиз тилини пухта ўзлаштиришга астойдил киришган. Айни пайтда унинг инглиз тилини билиш даражасини кўрсатувчи “IELTS” ва “CEFR” сертификатлари мавжуд.  

Гарчи ёш бўлишига қарамай ўз олдига катта мақсадларни қўйган интилувчан Сардор бир вақтнинг ўзида Тошкент Халқаро таълим университети, Америка Қўшма Штатларининг Сент Луис, Буюк Британиянинг Лондон, Метрополитен, Германиянинг  Иқтисодиёт университети, Кореянинг Пусан, Россиянинг Халқаро иқтисодиёт ҳамда Малайзия, Латвия давлатларидаги нуфузли олий таълим даргоҳларида таҳсил олиш имкониятини қўлга киритди.

Оқилхон Дадабоев, ЎзА