Тошкентда от спортининг човкен йўналиши бўйича ўтказилган Осиё чемпионати мусобақаларида БАА, Покистон, Ҳонг Конг, Қозоғистон, Қирғизистон ҳамда Ўзбекистон терма жамоалари ғолиблик учун кураш олиб борди.

Пойтахтимизда жойлашган "Universal Horses Stable" от спорти марказида ўтказилган қитъа чемпионати мобайнида мамлакатимиз вакиллари биринчи кунги ўйинларда Бирлашган Араб Амирликлари жамоасини 3:0, иккинчи учрашувда Қозоғистон жамоасини 7:0, ҳал қилувчи баҳсда Покистон терма жамоасини 4:0 кўринишида доғда қолдирди ва чемпионликни тантана қилди.

Қитъа биринчилигида 2-ўрин Покистон, 3-ўрин Қозоғистон вакилларига насиб этди.
Айтиш лозим, Ўзбекистон човкен федерацияси ўтган йили ташкил этилган бўлса-да, юртимиз вакиллари ушбу спорт турида қисқа фурсатда юқори натижаларга эришиб келмоқда.

Мазкур қитъа чемпионати човкен бўйича Ўзбекистон терма жамоаси аъзоларига жорий йилнинг 25 сентябрь - 9 октябрь кунлари Озарбайжонда ташкил этиладиган МДҲ ўйинларига тайёргарлик вазифасини ўтагани билан аҳамиятли бўлди.

Т.Рўзиев, ЎзА