Мамлакатимизда чорвачилик соҳаси ва унинг тармоқларини янада ривожлантириш, республика аҳолисини чорвачилик маҳсулотлари билан барқарор таъминлаш, маҳсулотлар ишлаб чиқариш имкониятларини ошириш ҳамда озиқ-овқат хавфсизлигини таъминлаш бўйича самарали ишлар амалга оширилмокда.

Бугунги кунда юртимизда қорамолчилик йўналишида 7 минг 614 та, қўй ва эчкичиликда 3 минг 263 та, йилқичиликда 142 та, туячиликда 52 та, паррандачиликда 1 минг 298 та, балиқчиликда 4 минг 829 та, асаларичиликда 715 та ва қуёнчиликда 254 та чорвачилик субъекти фаолият юритиб келмокда. 
 
Ветеринария ва чорвачиликни ривожлантириш давлат қўмитаси билан биргаликда Қишлоқ хўжалиги вазирлиги, Қорақалпоғистон Республикаси ҳамда вилоят ва туман ҳокимликлари чорвачилик субъектларида чорва моллари бош сони ва маҳсулот ишлаб чикариш ҳажмларини кўпайтириш ҳамда чорва мол бош сонига мутаносиб равишда озуқа экин ер майдонларининг ажратилиши бўйича чора-тадбирлар дастури тасдиқланиб, қатор амалий ишлар қилинмоқда. 

Хусусан, чорвачилик озуқа базасини мустаҳкамлаш учун асосий озуқа экинлари майдони 405,3 минг гектар бўлиб, (2021 йилда 339,7 минг гектар) ўтган йилга нисбатан 66 минг гектар кўп ажратилди. Такрорий озуқабоп экинлар экиш учун режалаштирилган 221,3 минг гектар ғалладан бўшаган майдонларга тўлиқ такрорий маккажўхори экини экилди. Бундан ташқари, келгуси йил учун 12,4 гектар янги беда, 102,2 минг гектар оралиқ озуқа экинлари экиш белгиланган бўлиб, ҳозирда экиш ишлари якунига етказилмокда. 
 
Давлат томонидан қўллаб-қувватлаш бўйича берилган субсидия ва имтиёзлар натижасида жорий йилда гўшт ишлаб чикариш ўтган йилга нисбатан чорвачилик фермер хўжаликларида 137,7 фоизга, сут 104,2 фоизга, чорвачилик қишлоқ хўжалиги корхоналарида гўшт 129 фоизга, сут 127,4 фоизга кўпайди. 
 
Ушбу маълумотлар “Ўзбекистон Республикасида чорвачилик соҳаси ва унинг тармоқларини ривожлантириш бўйича 2022 – 2026 йилларга мўлжалланган дастур доирасида олиб борилаётган чора-тадбирлар тўғрисида”ги Олий Мажлис Қонунчилик палатасининг парламент сўровига Бош вазирнинг аграр ва озиқ-овқат соҳаларини ривожлантириш масалалари бўйича ўринбосари Ш.Ғаниевнинг жавобида тақдим этилган. Парламент сўровига жавоб Қонунчилик палатасининг мажлисида кўриб чиқилиб, қарор қабул қилинди. 

 
Муҳтарама Комилова, ЎзА