2020 йил 29 январда қабул қилинган “Чорвачилик тармоғини давлат томонидан қўллаб-қувватлашнинг қўшимча чора-тадбирлари тўғрисида”ги қарори халқимизга арзон ва сифатли гўшт, сут маҳсулотларини етказиб беришда чорвачилик тармоғини давлат томонидан қўллаб-қувватлаш ва рағбатлантириш муҳим ўрин тутади. Қарор билан бу тармоқ учун кўплаб имтиёзлар берилди.   

Фарғона вилоятида 1 миллион 20 мингдан ортиқ чорва бош сони бор. 

Қува туманидаги “Роҳатой” фермер хўжалиги кўп тармоқли хўжалик бўлиб, чорвачилик, балиқчилик, асаларичилик каби йўналишлар йўлга қўйилган. Бугунги кунда 100 бош наслли қорамол, 22 бош от ҳамда 950 бош қўй-эчкиси бор.

– Чорвачилик яхши даромад манбаи ҳисобланади. Дастлаб жайдари қора молларни боқишни бошладик. Бир пайтлар шу чорвани сақлаб туришнинг ўзи ҳам қийин бўлган, бугун барча муаммоларни енгиб ўтдик. 2017 йилда Германиядан 50 бош наслли мол олиб келдик. Зотдор чорва моллари келтиргач, даромадимиз йил сайин ортмоқда, – дейди фермер хўжалиги раҳбари Авазбек Тешабоев. 

Ҳозирда фермер хўжалиги чорвачилик кластерини ташкил этиш ишларини бошлаб юборди. Бу ерда наслли чорвалар сони янада кўпайтирилиб, 250 бошга мўлжалланган бўрдоқичилик мажмуаси, сут, гўшт ва терини қайта ишлаш тармоқлари, замонавий қушхона ишга туширилади. Мазкур ишлар учун 12 миллиард сўмликдан зиёд маблағ сарф этилади.