Самарқанд ветеринария медицинаси институтида Испаниянинг “OVIGEN” ва “WES” компаниялари вакиллари билан учрашув ўтказилди.
Республика Ипакчилик ва жун саноатини ривожлантириш қўмитаси таклифига кўра юртимизда меҳмон бўлиб турган мазкур делегация билан қоракўлчилик соҳасидаги ҳамкорлик лойиҳалари ва дастурларини муҳокама қилиш, бу борада илғор хорижий тажрибаларни оммалаштириш кўзда тутилган. Чунки, мазкур компаниялар Испания қироллигининг наслчилик ва генетика соҳасидаги етакчи компанияларидан саналиб, улар яратган қўй (АSSAF) зоти маҳсулдорлиги юқорилиги билан ажралиб туради. Шунингдек, улар генетика соҳасида катта тажрибага эга бўлиб, дунёнинг кўплаб мамлакатларига уруғ ва эмбрион экспорт қилади.
Испан мутахассисларининг фикрича, чорвачиликда генетика ва наслчиликнинг илмий асосларини ривожлантирмасдан самарали фаолиятни таъминлаш имконсиз. Бунинг учун эса замонавий лабораториялар, малакали мутахассислар ва бозор иқтисодиёти қонунларига асосланган соғлом рақобат муҳити зарур.
Меҳмонларга ушбу йўналишларда Марказий Осиёда ягона бўлган Самарқанд ветеринария медицинаси институтида амалга оширилаётган илмий тадқиқотлар, ишлаб чиқилаётган лойиҳалар ҳақида маълумот берилди.
– Бизда бу соҳа анча ривожланган, – дейди “WES” компанияси наслчилик ва генетик такомиллаштириш марказининг ветеринария ва репродукция бўлими директори Хосе Мануел Васкес Эрнандес. – Мамлакат иқтисодиётида хусусий тармоқ улуши давлатникидан катта, эркин рақобат муҳити шаклланган ва бу ҳолат чорвачилик ривожига ижобий таъсир кўрсатади. Маҳсулдорлиги юқори бўлган чорва зотларини яратиш ва мавжудларининг биологик имкониятларини такомиллаштириш борасида компаниялар томонидан олиб борилаётган илмий тадқиқотлар чорвачилик хўжаликлари томонидан эркин харид қилинади.
Учрашувда мамлакатимизда майда шохли молларни замонавий усулда сунъий уруғлантириш, уларнинг генетик банкини яратиш, эмбрионларни лаборатория усулида кўпайтириш бўйича Испания тажрибаси асосида замонавий наслчилик лабораториясини ташкил этиш режалаштирилгани маълум қилинди.
Ғ.Ҳасанов, ЎзА