Ўзбекистон Миллий кино санъати саройида Ўзбекистон Республикаси Маданият вазирлиги ҳузуридаги Кинематография агентлиги буюртмасига биноан “Арт-замон медиа” киностудияси томонидан суратга олинган “Чўлиқ” бадиий фильмининг премьераси бўлиб ўтди.

Кинематография агентлиги директори Шуҳрат Ризаев ушбу фильмнинг мазмуни ва жамиятдаги аҳамияти хусусида атрофлича сўз юритди.

Фильм ўз аёлини излаётган ёш йигитнинг улғайиш жараёни, ота-бола ўртасидаги турфа қарашлар, чўл ҳаётининг оғир синовлари, дўстлик ва устоз-шогирд муносабатлари, шунингдек, санъат ва илк севги кечинмалари ҳақида ҳикоя қилади. 

Сценарий муаллифи ва постановкачи режиссёр – Жамолиддин Қўзибоев, постановкачи оператор – Умид Маликов, постановкачи рассомлар – Жамолиддин Қўзибоев, Ҳусайнбой Эшниёзов. Картинага Шоҳрух Неъматов директорлик қилган. 

– Фильмда кўпгина профессионал актёрлар билан ишлашга ҳаракат қилдик, – деди фильм режиссёри Жамолиддин Қўзибоев. – Чунки постановкалар анча мураккаб, персонажларнинг ички дунёси, ҳиссиётлари ҳам нозик тасвирланган. Суратга олиш ишлари бир неча ҳудудларда ўтказилди. Мамлакатимизда илк бор чўпонларнинг ҳаёти, меҳнат фаолияти ҳақида ушбу кинокартина ишланди. Ўйлайманки, мухлислар томонидан илиқ кутиб олинади. 

Фильмда ролларни Ноила Тошкенбоева, Рустам Каримов, Карим Мирҳодиев, Фарҳод Абдуллаев, Тоҳир Саидов, Сайёра Юнусова, Феруза Саидова, Фарҳод Худойбердиев, Сирожиддин Вафоев, Фотима Режаметова ҳамда бош ролларни Улуғбек Муҳаммадкаримов ва Сардор Абдуҳошимов каби маҳоратли актёрлар ижро этишган.

Н.Усмонова, 
ЎзА