Navro‘z bayrami arafasida Buxoro viloyati Qorovulbozor tumanining “Navbahor” mahalla fuqarolar yig‘inida “Besh tashabbus markazi” foydalanishga topshirildi.

–Viloyat hokimligi e’tibori va rag‘bati bilan bir paytlar “Do‘stlik” xo‘jaligi ma’muriy idorasi yonidagi eski madaniyat klubi tanlanib, qariyb yarim gektarli maydonda Buxoro neftni qayta ishlash zavodi homiyligida qayta qurish, mukammal ta’mirlash ishlari olib borilgan,– deydi “Navbahor” mahalla fuqarolar yig‘ini yoshlar yetakchisi Ilhom Safarov. – Bugunga kelib zamonaviy, ko‘rkam qiyofaga kirgan bir va ikki qavatli mazkur inshootda sportning badiiy gimnastika, milliy kurash, shaxmat-shashka, stol tennisi, badminton, kibersport, shuningdek, IT-axborot texnologiyalari, kompyuter savodxonligi, ingliz tili, rangli qog‘ozlardan gullar yasash, musiqa va milliy cholg‘u asboblari, tikuvchilik kabi to‘garaklar faoliyatni boshlamoqda. Markazda kitobsevar yoshlar uchun kutubxona, qolaversa, fitnes va trenajyor zali ham hozirlangan.

Navbahor mahallasi hududida 613 ta xonadon, 667 ta oila va ularda jami 2 ming 900 ga yaqin aholi istiqomat qiladi. Yoshlarni kasb-korga yo‘naltirish, bo‘sh vaqtini mazmunli tashkil qilish, aholi orasida sog‘lom turmush tarzini keng targ‘ib etish, yurtdoshlarimizni kitobxonlikka va san’atga, musiqaga oshno qilishda mazkur besh tashabbus markazi muhim ahamiyat kasb etadi.  

Cho‘lquvarlar tumanida zamonaviy maskanni foydalanishga topshirish marosimi tantanaga aylandi. Unda hozir bo‘lgan mutasaddilar, jamoatchilik, mahalla va ta’lim muassasalari jamoalari, tuman hokimi Akmal Ostonov va boshqalar qo‘shaloq bayram bilan samimiy muborakbod qilishdi. O‘sib kelayotgan ertamiz egalarining jamiyatga foydasi tegadigan munosib kadrlar bo‘lib yetishishlariga ishonch bildirdi.  

Zarif Komilov,

O‘zA