O‘zbek adabiyotining yirik namoyandasi, shoir, dramaturg, tarjimon va jamoat arbobi Abdulhamid Sulaymon o‘g‘li Cho‘lponning ijodi o‘zbek adabiyotining rivojida muhim o‘rin tutadi.

Cho‘lpon 1897 yil Toshkentda tug‘ilgan. Uning bolaligi va yoshlik yillari Turkistonning ijtimoiy va madaniy hayoti bilan chambarchas bog‘liq bo‘lgan. U dastlab an’anaviy maktabda, keyin esa yangi usuldagi maktablarda tahsil olgan. Cho‘lpon yoshligidanoq badiiy asarlar yozib, o‘zining qobiliyati bilan omma ko‘nglidan joy olgan va o‘zbek adabiyotining yetakchi namoyandalaridan biriga aylangan. Uning she’rlari, hikoyalari va romanlari o‘zbek xalqining hayoti,orzu-umidlari va muammolarini aks ettirgan.  

Abdulhamid Sulaymon o‘g‘li Cho‘lpon o‘zbek adabiyotining eng muhim namoyandalaridan biri bo‘lib, uning ijodi o‘zbek xalqining hayoti, orzu- umidlari va milliy o‘zligini chuqur aks ettiradi. XX asr boshidagi murakkab ijtimoiy-siyosiy sharoitlarda yashagan Cho‘lpon o‘z asarlarida xalqning ma’naviy olami, kundalik turmushi va istiqlolga intilishlarini ko‘zga yaqin tasvirlar orqali yoritib bergan. Uning she’riyat va nasriy asarlarida o‘zbek xalqining azaliy qadriyatlari, tabiatga muhabbati va erkinlikka bo‘lgan intilishlari mujassamlashgan.

Cho‘lpon adabiyotida jamiyatning ijtimoiy, siyosiy masalalar bilan bir qatorda gender masalalari, ayniqsa, ayollarning ijtimoiy va shaxsiy huquq-erkinliklari va jamiyatdagi o‘rni kabi mavzular muhim o‘rin tutadi. Cho‘lpon asarlarida ayol obrazlari orqali u, ayollarning an’anaviy jamiyatdagi mavqeini tanqid qilib, ularning erkinligi va teng huquqliligini targ‘ib qilgan.

Cho‘lpon faqat adib emas, balki jamoat arbobi hamdir. U o‘z asarlari bilan xalqning dunyoqarashini ijobiy tomonga o‘zgartirishga, zamonaviy va har tomonlama rivojlangan ma’nan yetuk xalq bo‘lib shakllanishiga butun kuch-quvvati bilan harakat qilgan bo‘lsa-da, sovet istibdodi natijasida qatag‘onga uchrab vafot etdi.

"Jadidlar — millat qahramonlari" loyihasining bu galgi soni o‘zbek adabiyotining yirik namoyandasi, shoir, dramaturg, tarjimon va jamoat arbobi Abdulhamid Sulaymon o‘g‘li Cho‘lpon hayoti, ijodi va faoliyatiga bag‘ishlandi. Ushbu videolavha Mudofaa vazirligi Axborot va ommaviy kommunikatsiyalar departamenti bilan hamkorlikda tayyorlandi.

<iframe width="640" height="420" src="https://www.youtube.com/embed/oys-kfnkCxI" title="Cho‘lpon va zamon" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Muhayyo Turdaliyeva, Anvarxo‘ja Ahmedov (video), O‘zA