Саёҳат манзиллари

Қашқадарё вилоятининг Миришкор тумани вилоятнинг чўл ҳудудларидан ҳисобланади. Вилоятнинг Туркманистон билан чегарадош бу қисмида яшовчи аҳоли асосан қоракўлчилик билан машғул. Саховатли чўл бағрида саноат корхоналарининг кўплаб конлари ҳам мавжуд.

Кескин шамол чўл қумларини эркалайди. Тўлқинсимон қум барханлари орасидан ўтиб борар эканмиз, чўл арчаси ҳисобланган юлғун ва саксовуллар бизни қарши олади. Биз чўл бағридаги баҳри муҳит Сичанкўлнинг қуйилиш жойидаги шаршарани томоша қилиш учун кетардик. Кимсасиз биёбоннинг адоғи йўқдек гўё. Аммо у ерда инсониятга сездирмайгина ҳаёт қайнайди. Ҳар қадамда чўлда яшовчи жониворларни учратиш мумкин.

[gallery-7977]

Ниҳоят узоқ йўл юриб, Сичанкўлга сув қуйиладиган шаршарага етиб келдик. Маҳобатли шаршаранинг гувуллаган наъраси кишига ўзгача завқ беради. Табиий ҳолатда узоқ йиллар кўлга сув тушиши натижасида ҳосил бўлган ушбу шаршара атрофида ўзгача эко-муҳит шаклланган. Инсон қадами камроқ бўлгани учун турли хил ҳайвонот ва наботот олами бу ерни ошён тутган.

Кутилмаган ташрифдан шошиб қолган ёввойи ўрдаклар тўдаси гур этиб ҳавога кўтарилади. Шаршара остидаги мавжланиб турган сув ўтлари орасидан балиқлар қимтинибгина мўралайди. Қарийб 7 минг гектар жойни эгаллаган Сичанкўлга асосий сув мана шу ердан қуйилиб туради. Асосан сизот сувлар эвазига пайдо бўлган кўл табиати ўзига хос. Сичанкўл балиқлари гўштини мазаси эса тилларда достон.

Балиқ ови мавсуми тугаши арафасида қолдирилган бўлса керак балиқчилар қайиғи кўл қирғоғидаги саёзликка чиқариб қўйилган. Сувга тушириб, бироз уммонни сайр қилдик. Шамол тўлқинларни, тўлқинлар эса бизни кўл ўртасига шошибгина итаради, гўё ҳақиқий гўзаллик ҳали олдинда уни кўрмасдан кетманглар, деяётгандик. Лекин юрак бетламади, қирғоқдан кўп олислай олмадик.

Чўл қуми антиқа бўлади. Яланг оёқ юрсангиз ҳам чанг юқмайди. Одамни бўйламайдиган қирғоқдаги қамишзорларни ёввойи қушлар макон қилган. Хуллас минг бор эшитгандан, бир бор кўрган афзал. Қашқадарё томонларга йўлингиз тушса, албатта чўл бағридаги Сичанкўл ажойиботларидан баҳра олинг.

Ўлмас Баротов, Жамшид Норқобилов (сурат), ЎзА