Янги лойиҳа: Академик

Ўзбекистон Фанлар академияси академиги, Умумий ва ноорганик кимё институти фосфорли ўғитлар лабораторияси мудири, Ўзбекистонда хизмат кўрсатган ихтирочи ва рационализатор Шафоат Намозов билан суҳбатлашдик.

Олим ўз болалик йилларини эслар экан, илмга бўлган қизиқиш қишлоқ шароитида, оғир кунларда шаклланганини таъкидлади. Отаси эрта вафот этган, онаси қўлида тарбия топган Шафоат Намозов Сурхондарё вилояти, Шўрчи туманида туғилиб, шу ерда мактаб таълимини олган. Қишлоқ шароитида ўқиш осон бўлмаган, аммо илмга бўлган иштиёқ уни доимо олдинга етаклаган.

Унинг айтишича, қишнинг совуқ кечаларида керосин чироғи ёнида дарс тайёрлаш одатга айланган. Онаси чироқни ўчиришни сўраганида, уни пасайтириб, ўқишни давом эттирар, онаси ухлаб қолганидан кейин эса яна туриб дарс қиларди. Ана шу машаққатли кунлар илмга муҳаббатни янада мустаҳкамлаган.

Болалигиданоқ у ўз олдига аниқ мақсад қўйган — илм орқали инсонларга фойда келтириш. Бу орзу уни бутун умри давомида илмий изланишларга чорлаб келмоқда.

Шафоат Намозов Тошкент кимё-технология институтини тамомлаб, кейинчалик аспирантурада таҳсил олган.

Олим қишлоқ хўжалигида тупроқ унумдорлигини ва экинлар ҳосилдорлигини ошириш учун янги ўғитлар технологиясини ишлаб чиққан ва у амалиётга жорий қилинган.  

Унинг илмий раҳбари Ўзбекистоннинг йирик олимларидан бири академик Малик Набиев  бўлган. Устоз билан бирга олиб борилган илмий изланишлар унга нафақат касбий билим, балки ҳаётий тажриба ҳам берган.

Суҳбатнинг тўлиқ қисмини ЎзАнинг You Tube саҳифасида кўришингиз мумкин.

<iframe width="640" height="420" src="https://www.youtube.com/embed/yQtfSC8LV4U" title="Chiroq shu’lasida izlangan ilm" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Нигора Раҳмонова, Ойбек Давронов (видео),

Улуғбек Тўхтаев (монтаж), ЎзА