Қытайдың China Southern Airlines әуе компаниясы Өзбекстанға ұшатын рейстер санын көбейтуді жоспарлап отыр.

Бұл туралы Uzbekistan Airports баспасөз қызметі хабарлады.

Uzbekistan Airports пен China Southern Airlines арасында өткен келіссөздер барысында әріптестікті кеңейту, қазіргі рейстердің санын арттыру және Өзбекстан әуежайларына жаңа бағыттар ашу мәселелері талқыланған.

Компаниялар қолданыстағы бағыттардың жиілігін аптасына жеті ретке дейін арттыру мүмкіндігін қарастыруда. Қазіргі таңда China Southern Airlines Ташкент–Бейжің (аптасына 4 рейс) және Ташкент–Үрімші (аптасына 5 рейс) бағыттарында тұрақты рейстерді жүзеге асырып келеді.

Сонымен қатар, Uzbekistan Airports компаниясы Әндіжан, Наманган және Ферғана қалаларынан Қытай қалаларына жаңа бағыттар ашуды ұсынған.

Айта кетейік, China Southern Airlines – Гуанчжоу қаласында орналасқан, ішкі, аймақтық және халықаралық бағыттар бойынша қызмет көрсететін Қытайдың ірі әуе компанияларының бірі.