Прага архиепископи кардинал Доминик Дука муқаддас Вита черковида ваъзхонлик қилаётган чоғида коронавирусни Хитойнинг "биологик қуроли", деб айтди, деб хабар қилади Праганинг CNN Prima News телеканали.

"Ҳозир, айни вазиятда бу Хитойнинг энг ёмон вируси бўлиб, у биологик қурол ҳисобланади. Дунёнинг барча ҳарбий мутахассислари шу фикрда, бироқ улар буни айтишга қўрқади ёки журъат эта олмайди", – деди Дука.

Архиепископнинг айтганларига чехиялик айрим етакчи тиббий экспертлар раддия билдиришмоқда. Масалан, таниқли иммунолог Вацлав Горейши жумладан шундай дейди:

"Дуканинг баёноти, шунчаки жанжал келтириб чиқаришдир. Жаноб кардинал сохта хабарларни тарқатувчи одамга айланиб қолмоқда. Мен ҳам католикман ва черковимизга шундай одамнинг раҳбар бўлиши мен учун жуда хижолатли", – деди Горейши CNN Prima News телеканалига берган интервьюсида.

Олимнинг таъкидлашича, коронавирус сунъий яратилган, деб ҳисоблайдиган одамлар сиёсий ёки мафкуравий мақсадларни кўзлаб шундай хабарларни тарқатади.