Токио-2020 ХХХII ёзги Олимпия ўйинлари барча юртдошларимизга чексиз қувонч ва ғурур бағишлади. Чунки унда ўзбекистонлик спортчилар 3 олтин ва 2 бронза медалини қўлга киритиб, медаллар жамғариш бўйича умумжамоа ҳисобида 32, МДҲ мамлакатлари орасида 2, туркий тилли ва Марказий Осиё давлатлари ичида 1-ўринни эгаллади.

Ана шундай юксак натижани юртимизга туҳфа этган спортчиларимизга бугун ҳамма ҳавас билан қарамоқда. Айниқса, юрт шаънию шарафини, Ватан байроғини кўкка кўтарган спортчи фарзандларнинг оналари бутун Ўзбекистон оналарининг ҳавасидаги, ҳурмат ва эътиборидаги инсонга айланишди. Ўстириб, улғайтирган фарзандинг она Ватанга улкан довруғ улашса, миллат фахрига, ғурурига айланса, элу юрт ва давлат раҳбарининг эътирофига, таҳсинига сазовор бўлса, оналар учун қандай шараф бу! Ҳар қандай она зоти борки, фарзандининг кичик бир зарра каби ютуғидан-да кўкси осмон қадар юксалади.

Токио Олимпиадаси олтин медали соҳиби, жаҳон чемпиони, Ўзбекисоннинг қаҳрамонига айланган Баҳодир Жалоловнинг онаси Сабоҳат опа Жалолова ҳам паҳлавон ўғлининг улкан натижасидан бахтиёр, ўзига сиғмас даражада қувончда, қалби жўшиб, қадди баланд бўлди. Ўзбек аёлига хос соддалик, самимийлик, камтаринлик, хокисорлик Сабоҳат опанинг буюк она сиймосига янада зеб бериб турибди, назаримда. Бунга опа билан телефон орқали боғланиб, суҳбатлашган чоғимда яна бир карра амин бўлдим.

— Ўғлим Баҳодиржоннинг ютуғидан жуда бахтиёрман. Юртимизда спортга, спортчиларга қаратилаётган эътибор, Президентимизнинг ғамхўрлиги ва ушбу соҳани қўллаб-қувватлаши натижасида катта марралар қўлга киритиляпти. Жумладан, ўғлим ҳам ана шу эътибор, яратиб берилаётган шароитлар самараси ўлароқ, бугун ўз орзусига эришди, юртимиз байроғини баланд кўтаришга, мадҳиямиз янграшига муяссар бўлди. Давлатимиз раҳбари Токио Олиппиадаси иштирокчилари ва уларнинг мураббийлари ҳамда ота-оналари билан учрашиб, алоҳида миннатдорлик билдирдилар, фарзандларимизни, мураббийларни давлат мукофотлари, орден ва медаллар билан тақдирлади. Хусусан, ўғлим Баҳодир Жалолов «Фидокорона хизматлари учун» ордени билан тақдирланди. Бу тарихий лаҳзалардан ўзимга сиғмай кетяпман. Она учун фарзандининг бу каби ютуғидан ортиқ муҳим нарса бўлмаса керак, — дейди Сабоҳат опа.

— Бокс шиддатли спорт турларидан бири ҳисобланади. Аввал бошида ўғлингизни бу спорт турига беришга қўрқмаганмисиз?

— Албатта, қўрқув бўлган, чўчиганман, иккиланганман. Аммо оиламизда хўжайиним нима десалар, шу бўларди. Баҳодирнинг раҳматли отаси ўғлимиз боксчи бўлишини, чемпион бўлишини жуда хоҳлаганлар, орзу қилганлар ва бунинг учун зарур шароитларни яратиб беришга ҳаракат қилган эдилар. 4 ёшидан бошлаб спортга йўналтириб, шуғуллантирган, ҳовлимизга керакли спорт анжомларини ўрнатиб, шароит қилиб берган. Кейинчалик ўғлимизнинг катта-кичик ютуқларидан қувониб юрарди. 2014 йилда Россияда бўлиб ўтган 12-Жаҳон кубогида олтин медаль билан тақдирланганда, дадаси “Ўғлим чемпион бўлди, энг катта орзуим ушалди”, деб ўзига сиғмас даражада хурсанд бўлган...

— Спортчининг онаси бўлиш осон эмас, назаримда. Айниқса, она учун фарзандининг мусобақа жангларини кўриш, турли зарбаларга қарши туриб беришини, ўрни келса, жароҳат олганини томоша қилиш оғир. Бу жараёнлар сизда қанақа кечади?

— Албатта, осонмас! Ўғлимга теккан зарба менинг юрагимга теккан зарбадир. Шунинг учун, тўғриси, Баҳодирнинг жангларини онлайн эфирда кўролмайман. Чунки томоша қилиб ўтиришга юрагим дош бермайди. Анчадан кейин такрорийсини кўраман. Одатда мусобақаларга чиқишидан 10 кунлар олдин юрагим ўйнаб, ҳапқириб бошлайди. Ўзимни қўярга жой топа олмайман, ваҳимага туша бошлайман. “Нима бўларкан, ғолиб бўла олармикан”, деган ўй билан хавотирлана бошлайман.

— Баҳодир Жалолов Токио Олимпиадасида ютганида, иштирокчилар қайтганида кутиб олиш жараёнида, Президент совғалари улашилган тарихий лаҳзаларда қалбингиздан нималар кечди?

— Бу пайтда роса хурсанд бўлдим, кўз ёшларимни тия олмадим. Яна бир томондан унинг боксчи бўлишини, чемпионликка эришишини орзу қилган дадаси бу кунларни кўра олмаганидан ўкиндим. Жаҳон чемпиони бўлганида отаси ёнида бўлиши керак эди, деб қийналдим. Афсуски, отасига бу кунларни кўриш насиб қилмаган экан...

— Ўғлингиз бокс оламида ўз ўрнига эга, барчанинг ҳавасидаги спортчи. Шу маънода Баҳодир Жалоловнинг ўзи туғилиб ўсган Сурхон воҳаси, Сариосиё туманидаги ўрни, қўни-қўшниларнинг муносабати қандай? Унга ҳавас қилиб, фарзандини шогирдликка бериш истагидаги инсонлар кўп бўляптими?

—  Туманимиздагилар, қўни-қўшнилар ҳаммаси хурсанд, албатта. Чемпионимиз, деб фахрланишяпти. Нафақат туман, балки вилоят миқёсида спортга, боксга қизиқувчилар сони ортяпти. Кунда-кунора эшигимизни тақиллатиб келишади “шогирдликка олсин” деган илтимос билан. Лекин республика терма жамоа аъзоси сифатида ўзининг ишлари, мусобақаларга тайёргарликлари кўплиги боис улгурмаётган эди.  

Президентимиз Олимпиада иштирокчилари билан учрашувда Баҳодирнинг бокс мактабини ташкил этиш, бунинг учун давлат томонидан барча шарт-шароитлар яратиб бериш бўйича топшириқ бердилар. Бундан жуда хурсанд бўлдик. Келгусида ўғлим, албатта, давлатимиз раҳбарининг ишончини оқлаб, устозларидан ўрганганларини, орттирган тажрибаларини ёшларга астойдил ўргатади.

— Президентимиз томонидан тақдим этилган совғалардан мамнун бўлганингиз шубҳасиз. Уй ёқдими?

— Албатта, хурсанд бўлмай бўладими!? Давлатимизнинг, Президентимизнинг фарзандларимизга эътибори, меҳрибонлигидан, туҳфа қилинган қимматбаҳо совғалардан жуда мамнунмиз. Худо хоҳласа, Президентимиз совға қилган уйга кўчиб ўтамиз. Тўйлар қиламиз, деб яхши ният қилиб турибмиз.

— Келинликка номзод борми? Жаҳон чемпионига спортчи қиз танлайсизми ёки бошқа соҳа вакили бўладими?

— Ҳозирча номзод йўқ. Худо хоҳласа, энди танлаймиз. Спорт соҳасига алоқадор эмас, аммо ўқимишли, зиёли, оддий қизни келин қилиш ниятидаман.

— Илоҳим ниятингизга етинг. Баҳодир Жалоловнинг ютуқ ва марралари бундан-да юксак бўлсин. Юртимиздаги барча оналарга сиз каби паҳлавон, чемпион ўғилнинг волидаси, юртга ифтихор, қалбга мадор бўладиган фарзандларнинг онаси бўлиш насиб қилсин.

ЎзА мухбири Муҳтарама Комилова суҳбатлашди.