Америка Қўшма Штатларида футбол бўйича клублар ўртасида ўтаётган жаҳон чемпионатининг иккинчи ярим финал ўйинида Франциянинг “ПСЖ” жамоаси Мадриднинг "Реал"клубини 4:0 ҳисобида мағлубиятга учратди.

13 июль куни АҚШнинг Нью-Жерси штати, Ист-Ратерфорд шаҳрида жойлашган “MetLife Stadium”да ўтадиган клублар ўртасидаги жаҳон чемпионати финалида “ПСЖ” “Челси” билан куч синашади.

Айтиш лозим, Лондоннинг “Челси” жамоаси клублар ўртасидаги жаҳон чемпионати финалида учинчи марта қатнашмоқда. 2012 йили “Челси” финалда Бразилиянинг "Коринтианс" жамоасига 1:0 ҳисобида мағлуб бўлган эди. 2022 йилги клублар ўртасидаги жаҳон чемпионати финалида лондонликлар яна бир Бразилия жамоаси бўлган "Палмейрас" билан рўбарў келиб, 2:1 ҳисобида ғалабага эришган эди.

“ПСЖ” эса ушбу мусобақада биринчи марта иштирок этмоқда. Ўтказилган ўзаро ўйинлар статистикасига назар солсак, Париж жамоаси ўтказилган 9 та расмий ўйиннинг 4 тасида ғалабага эришган, 3 тасида “Челси”нинг қўли баланд келган. 2 тасида муроса йўли танланган.

Клублар ўртасидаги жаҳон чемпионати финали “Челси” – “ПСЖ” жамоаларининг ўнинчи бор катта мусобақада рўбарў келишини англатмоқда.

Хўш, океан ортида миллионлаб футбол ишқибозлари диққат-марказида кечадиган ўйинда бу сафар кимнинг қўли баланд келади? Бунга 13 июль куни ўтадиган шиддатли ўйин якунида жавоб оламиз.

Тўлқин Рўзиев,

ЎзА