Jizzax viloyatidagi umumta’lim maktablarining 10-11 sinf o‘quvchilari Markaziy harbiy okrugning Forish tog‘ poligonida jangovar quroldan o‘q otish mashqlarini bajardi.
Ushbu amaliy mashg‘ulot davlatimiz rahbari tomonidan umumta’lim maktablari yuqori sinf o‘quvchilarining “Chaqiriqqa qadar boshlang‘ich tayyorgarlik” fanidan olgan nazariy bilimlarini mustahkamlash maqsadida o‘quv yilida bir marta harbiy poligonga olib chiqish tizimini joriy etish bo‘yicha berilgan topshiriq ijrosini ta’minlash maqsadida o‘tkazildi. Bunda O‘zbekiston Respublikasi Mudofaa va Xalq ta’limi vazirliklarining qo‘shma qarori imzolangan.
Forish tog‘ poligonida Markaziy harbiy okrug qo‘mondonligi, Jizzax viloyati jamoatchilik kengashi vakillari ishtirok etgan jangovar mashqlar o‘quvchi yoshlarning saf tayyorgarligi ko‘rigi bilan boshlandi. Unda viloyat maktablaridan 200 nafardan ortiq o‘quvchi qatnashdi.
Tadbirda Markaziy harbiy okrug qo‘shinlar qo‘mondoni Oybek Saidov va boshqalar yurtimizda yoshlarni har tomonlama barkamol, vatanparvar qilib voyaga yetkazishda berilayotgan katta e’tibor, bu jarayonda chaqiriqqa qadar boshlang‘ich tayyorgarlikning o‘rni, xususan, bugungi mashqlarning ahamiyati katta ekanligini ta’kidlab o‘tdi.
Poligonning o‘q otish nuqtasida yuqori sinf o‘quvchilarining jangovar qurollardan o‘q otish mashqlari oldidan texnika xavfsizligi qoidalari bo‘yicha mashg‘ulot o‘tkazildi. Mashg‘ulotda avtomat o‘qdonini o‘qlash, nishonni aniq mo‘ljalga olish, avtomatni noto‘liq qismlarga ajratish va yig‘ish kabi mashqlar bajarildi. Otish qoidalari va xavfsizlik talablari bo‘yicha berilgan yo‘riqnomalardan keyin yoshlar o‘q otish maydoniga yo‘l oldi.
O‘quvchilarning o‘q otar qurolni ishlatishlari tajribali harbiylar tomonidan nazorat qilib borildi. Har bir o‘quvchi 100 metr uzoqlikda turgan nishonga qarata 3 dona o‘q uzib, maktabda o‘tilgan chaqiriqqa qadar boshlang‘ich tayyorgarlikdan olgan nazariy bilimlarini amalda mustahkamladi.
O‘quv mashqi davomida jangovar texnika va o‘qotar qurol namunalari ko‘rgazmasi ham tashkil etildi. Haqiqiy qurollar bilan tanishuv, ularning jangovar imkoniyatlari va texnik tasnifi haqidagi ma’lumotlar yoshlarda katta qiziqish uyg‘otdi.
Mashg‘ulot yakunida, harbiy intizom va mohir merganlik borasida yuqori natija ko‘rsatgan yoshlar okrug qo‘mondonining esdalik sovg‘alari bilan taqdirlandi.
O‘quvchilar o‘tkazilgan ilk mashg‘ulotda olgan bilim va ko‘nikmalarini xarbiylar oshxonasining askarcha tushlik dasturxoni ustida muhokama qildi.
[gallery-2409]
T.Beknazarov, J.Yorbekov (surat), O‘zA