Техник жиҳатдан тартибга солиш соҳасида назорат инспекцияси томонидан Андижон шаҳрида жойлашган “SMT” МЧЖга қарашли “MTTY” савдо дўконида Туркияда ишлаб чиқарилган янги туғилган чақалоқлар кийими маҳсулоти бўйича назорат хариди ўтказилди.

Танлаб олинган маҳсулот аккредитациядан ўтган синов лабораториясига топширилиб, таҳлиллар жараёнида техник регламент талабларига кўра қуйидаги номувофиқликлар аниқланди. Жумладан, мато таркиби: асосий мато 100 фоиз пахта, декоратив мато 100 фоиз полиэфир тола экани аниқланди.

Тикув ишлови ўралган бириктирувчи тикувлар буюмнинг олд томонида бажарилмаган. Шунингдек, декоратив элементлари синтетик толадан тайёрланган бўлиб, боланинг бўйин ва қўл терисига бевосита тегиб туради. Мазкур маҳсулотлардан фойдаланиш болаларда аллергик касалликлар ва тери яллиғланишига олиб келиши мумкин.

Ушбу номувофиқ маҳсулотларни реализация қилган “SMT” МЧЖга нисбатан чоралар кўрилиши ва савдо нуқталаридан чиқарилиши бўйича мурожаатлар юборилди ҳамда масала назоратга олинди.

Гулноза Бобоева, ЎзА