Божхона қўмитаси матбуот хизматининг хабар беришича, «Яллама» чегара божхона пости ходимлари томонидан юртимиздан чиқиб кетаётган фуқаро божхона назоратидан ўтказилганда ноодатий ҳолат аниқланди.

Текширув жараёнида фуқаронинг қўл сумкаси ичидаги умумий оғирлиги 111 грамм бўлган 2 дона олтин қуймаси топилди. Аниқланишича, бу қимматбахо буюмлар чақалоқ таглигига яширилган бўлган.

Дастлабки ҳисоб-китобларга кўра, ушбу олтинларнинг умумий қиймати 133 миллион сўмни ташкил этади.

Ҳозирда мазкур ҳолат юзасидан божхона органлари томонидан суриштирув ҳаракатлари олиб борилмоқда.

Эслатиб ўтамиз, амалдаги қонунчиликка мувофиқ, жисмоний шахслар 65 граммгача бўлган олтин ва 200 граммгача бўлган кумушдан тайёр заргарлик буюмларини декларациясиз олиб чиқишлари мумкин. Бу миқдордан ортиқ маҳсулотлар эса божхона декларацияси асосида рухсат этилади.

Ш.Маматуропова, ЎзА