Хабар берганимиздек, бугун Самарқанддаги “Ипак йўли” халқаро туризм марказида триатлон бўйича "Challenge Samarkand-2024" мусобақасининг асосий баҳслари ўтказилди.

1,9 километр сузиш, 86 километр велопойга, 21,5 километр югуриш баҳсларидан иборат беллашувда профессионал спортчилар, ҳаваскорлар ва жамоавий эстафета йўналишларида иштирокчилар ўзаро беллашди.

Мусобақанинг профессионал спортчилар баҳсида эркаклар ўртасида норвегиялик спортчи Кристиан Блумменфелт биринчи бўлиб марра чизиғини кесиб ўтди. Иккинчи ўринни яна бир норвегиялик спортчи Густав Иден қўлга киритган бўлса, учинчи ўрин германиялик спортчи Рико Богенга насиб этди.

– Мусобақадан олдин жисмоний тайёргарлик борасида бироз муаммоларга дуч келганлигим боис, рақибларимдан, хусусан, германиялик ёш спортчи Рико Богендан чўчигандим, – дейди мусобақа ғолиби Кристиан Блумменфелт. – Буни югуриш баҳсларининг дастлабки босқичигача Рико амалда ҳам исботлади. Аммо якунда ўзимда куч топа олдим ва мусобақани ижобий натижа билан якунладим. "Challenge Samarkand-2024" жуда юқори даражада ташкил этилган. Айниқса, велопойга йўналиши жуда ҳам ажойиб. Қадимий Самарқанд шаҳрининг диққатга сазовор жойлари, тарихий обидалар бўйлаб ҳаракатланиш кишига завқ беради. Дастлабки интервьюларимда ҳам таъкидлаганимдек, ушбу мусобақа менга унутилмас хотиралар тақдим этди ва якуний натижа ҳам шунга муносиб бўлди.

[gallery-19154]

Аёллар ўртасида ҳам ғолибликни норвегиялик спортчи Лаура Мадсен қўлга киритди. Иккинчи ўринни полшалик Марта Лаговник эгаллаган бўлса, учинчи бўлиб франциялик Жустин Гуэрард марра чизиғини кесиб ўтди.

Ушбу мусобақанинг ҳаваскорлар ҳамда жамоавий эстафета баҳсларида ҳам  ғолиблар аниқланди.

Мусобақанинг ҳаваскорлар баҳсининг эркаклар ўртасидаги ғолиблик ҳамюртимиз Андрей Шариповга насиб этган бўлса, иккинчи ва учинчи ўринларни нейтрал байроқ остида иштирок этган Семён Пивоваров ҳамда Иля Слепов қўлга киритди.

Жамоавий эстафета баҳсида эркаклар ўртасида биринчи ўринни “Ozone FC”  жамоаси, иккинчи ўринни “Team INVESTCIP” жамоаси ва учинчи ўринни “Building lights” жамоаси қўлга киритди. Аёллар баҳсида эса биринчи ўрин “Pyhteam5” жамоасига, иккинчи ўрин “TriCotelettes” жамоасига, учинчи ўрин “Wild Lioness of Tashkent” жамоасига насиб этди.

Ғ. Ҳасанов, А. Исроилов (сурат), ЎзА мухбирлари