Чад астанасы Нджаменадағы президент сарайына қарулы топ шабуыл жасады.

Tchadinfos порталының хабарлауынша, шабуыл барысында 18 шабуылшы жойылып, бір адам қайтыс болған. 

Шабуыл кезінде Президент Махамат Идрис Деби сарайда болған. Шабуылға «Боко Харам» лаңкестері қатысқан болуы мүмкін деген болжам айтылуда.

Соңғы жылдары Чадта тұрақсыз саяси жағдай қалыптасқан. 2021 жылдан бері ел өтпелі кезеңді бастан өткеруде. Бұл кезең көтерілісшілермен қақтығыс кезінде қаза тапқан бұрынғы президент Идрис Дебидің ұлы Махамат Идрис Дебидің билікке келуімен басталды.

2024 жылдың мамыр айында Чадта президенттік сайлау өтті, онда Махамат Идрис Деби 61 пайыз дауыс жинап жеңіске жетті. Оппозициялық «Трансформаторлар» партиясының көшбасшысы Суссес Масра 18,54 пайыз дауыс алған.

29 желтоқсанда елде соңғы 13 жылда алғаш рет парламент және жергілікті билік сайлауы өтті. Бұл сайлау өтпелі кезеңді аяқтау жолындағы қадам ретінде күтілген. Оппозиция сайлау нәтижелерін бұрмалау қаупі барын айтып, халықты дауыс беруге бойкот жасауға шақырды. Алғашқы нәтижелер 2025 жылдың 15 қаңтарына дейін жарияланады.