Судан жерінде 18 адамның өліміне байланысты екі ел арасындағы шиеленістен кейін Чад билігі Суданмен шекарасын жапты.

Al Hadath телеарнасының хабарлауынша, Чад билігі шекараны белгісіз мерзімге жауып тастаған. Бұдан бөлек Суданның Батыс Дарфур штаты аймағындағы шекараға қосымша әскер бөлімдерін жіберуде.

Екі елдің бірлескен шекарасының ұзындығы 1,4 мың шақырымды құрайды, ол Сахара шөлінің шығыс аудандары арқылы өткен.

Өткен аптаның сенбі күні Судан билігі Батыс Дарфурдан келген 18 шопан Чад тарапының қолынан қаза тапты деп хабарлаған соң, Судан Сыртқы істер министрлігі Чад елшісін шақырған. Шопандар көрші елден белгісіз біреулер ұрлап кеткен түйелерін Чадтың шекаралық аймағынан іздеген. Қайтар жолда қойшылар Суданда тұтқиылдан шабуылға ұшырап, қаза тапқан.