Хабар берганимиздек, шу кунларда Тожикистон пойтахти Душанбе шаҳрида футзал бўйича “CAFA Futsal Cup-2023” ўйинлари ўтказилмоқда.

Бир кун муқаддам Тожикистон жамоасини 4:2 ҳисобида мағлуб этган Ўзбекистон терма жамоаси аъзоларига кеча Афғонистон жамоаси билан ўтган учрашув омадсиз якунланди.  <iframe width="560" height="315" src="https://www.youtube.com/embed/kbT8umWbL4Y?si=gvCggHmORBafk9iU" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Учрашувнинг 2-дақиқасида рақиблар дарвозамизни аниқ нишонга олди. Ҳамюртларимиз 19-дақиқада Ҳусниддин Нишоновнинг голи эвазига ҳисобни тенглаштирди. 20 ва 28-дақиқаларда айнан Нишонов Ўзбекистон-Афғонистон “дуэли”да ҳисобни 3:1 кўринишига келишини таъминлади.  

Аммо 34, 38 ва 40 дақиқаларда Афғонистон футзалчилари ғалабага бўлган интилишини ва кучли иродасини намойиш этди. Ўйин 3:4 ҳисобида қўшни давлат жамоасининг ғалабаси билан поёнига етди.  

“CAFA Futsal Cup-2023” турнирининг 2-тур ўйинларидан кейин 6 очко жамғаришга муваффақ бўлган Афғонистон терма жамоаси якка пешқадамга айланиб олди. 

Айтиш лозим, футзалчиларимизни доғда қолдирган Афғонистон жамоаси икки кун муқаддам — 23 июль куни Қирғизистон жамоасини 5:4 ҳисобида мағлуб этган эди.  

Кейинги ўринларда эса 3 очко жамғарган Ўзбекистон, Тожикистон, Туркманистон, Эрон жамоалари 2-ўринга даъвогарлик қилаётган  бўлса, 2-турда биронта ҳам очко қўлга кирита олмаган  Қирғизистон вакиллари охирги ўринда бормоқда.  

Энди Ўзбекистон терма жамоаси навбатдаги учрашувни 26 июль куни Туркманистон жамоасига қарши ўтказади.  

“CAFA Futsal Cup-2023” ўйинлари 30 июлгача давом этади.  

Т.Рўзиев,  

ЎзА