Бұхара қаласында 2025 жылдан бастап әр екі жыл сайын қыркүйек–қараша айларында халықаралық заманауи өнер биенналесі өтеді. Бұл жөнінде Өзбекстан Республикасы Президентінің «Халықаралық заманауи өнер биенналесін жоғары деңгейде өткізу шаралары туралы» қаулысында белгіленген.

Негізгі мақсат - Өзбекстанның әлемдік мәдени картадағы беделін арттыру, заманауи өнер, тарихи мұра, креативті экономика мен туризмді үйлестіре отырып, елдің әлеуметтік-экономикалық дамуына үлес қосу.

Қазіргі уақытта осынау беделді шараға қызу дайындық жүргізілуде.

Мәдениет пен өнерді дамыту қорының мәліметінше, 2025 жылдың 5 қыркүйегінен 20 қарашасына дейін жалғасатын форум аясында жетекші заманауи суретшілермен сұхбаттар, музыкалық концерттер, бас аспаздардың кездесулері, қолөнершілер шеберлік сабақтары, өнер тарихына арналған симпозиумдар мен поэтикалық бағдарламалар ұйымдастырылады.

Алғашқы жылы Бұхара биенналесі «Жүректер дертіне шипа» тақырыбымен өтеді. Ол 10 апта бойы заманауи өнер, қолөнер және ұлттық тағамдар фестивальдері түрінде көрініс табады. Бұл бастама Орталық Азиядағы ең ірі әрі алуан қырлы мәдени жобалардың біріне айналады деп күтілуде.

Заманауи өнер биенналесі ғасырлар бойы ғылым, сәулет, қолөнер мен өнердің ордасы болып келген, ЮНЕСКО-ның Бүкіләлемдік мұралар тізіміне және «Шығармашыл қалалар желісі» бағдарламасына енген көне Бұхара қаласының халықаралық маңызын одан әрі арттыруға қызмет етеді.