2019 йилнинг сўнгги кунларида ҳаётимизга кириб келган ва қарийб 4 миллион одамнинг ҳаётига зомин бўлган коронавирусга қарши кураш ҳануз давом этмоқда.

Коронавирусга қарши кўплаб вакциналар ишлаб чиқилгани ва миллиардлаб одамлар эмланганига қарамай, пандемия ҳали тугаганича йўқ. Ана шундай шароитда Aнглия яна бир хасталикдан огоҳлантирмоқда.

Буюк Британиянинг "Daily Mail" газетаси ёзишича, профессор Антони Харнден грипп эпидемияси ҳақида ҳукуматни огоҳлантирган. Олим жорий йил қишда грипп COVID-19 га нисбатан оғир кечиши, ҳатто ўлимга олиб келиши мумкинлигини таъкидлаган.

«Биргина Буюк Британияда ҳар йили грипп туфайли 17 мингга яқин одам вафот этади. Мамлакатда сўнгги 18 ой ичида 125 минг аҳоли коронавирусдан вафот этди. Гарчи карантин даврида ижтимоий масофа сақланиши, комендантлик соати ва бошқа чора-тадбирлар сабаб грипп тарқалишининг паст даражаси кузатилаётган бўлсада, жорий йил қишда бу оғир кечиши мумкин. Боиси одамларда иммунитет пасайган», дея қўшимча қилди у.