Буюк Британия Россияни коронавирусга қарши вакцина ҳақидаги маълумотларни ўғирлашда айблади
Буюк Британияда SARS-CoV-2 га қарши вакцинани иккита илмий марказ ишлаб чиқмоқда.
Буюк Британиянинг киберхавфсизлик маркази баёнот беришича, Россияга тегишли хакерлар АҚШ, Бирлашган қироллик ва Канададан коронавирусга қарши курашда қўлланиладиган вакцина яратиш бўйича маълумотларни ўғирлашга ҳаракат қилган.
Хабарда аниқлик киритилишича, «кибержосуслик билан шуғулланаётган гуруҳ» APT29, ёки Dukes ва Cozy Bear, «катта эҳтимол билан» Россия разведка тузулмасига киради. Улар йил бошидан буён препарат тайёрлашда иштирок этаётган турли ташкилотларнинг маълумотлар базасига ҳужум қилиб келади.
Марказнинг тарқатган маълумотида айтилишича, хакерлар WellMess ва WellMail зарарлайдиган таъминот дастури ҳамда фишингдан тадқиқотчилар компьютерларига кириш учун фойдаланган. Разведка нуқтаи-назардан олиб қараганда, ушбу маълумотларнинг катта қисми унчалик қимматга эга эмас, бироқ ўғирланган маълумотлардан кейинроқ ёки муҳим аҳамиятга айлангандан кейин фойдаланиш мумкин.
Буюк Британияда SARS-CoV-2 га қарши вакцинани иккита илмий марказ ишлаб чиқмоқда. Уларнинг бири Оксфорд университети, иккинчиси Лондондаги Imperial College олий ўқув маркази. Англия оммавий ахборот воситаларининг махсус хизмат органлари берган маълумотларга таяниб ёзишича, иккала илмий муассаса ҳам хакерлар ҳужумига дуч келган. Бироқ қанчалик даражада зиён кўргани ҳақда хабарда айтилмаяпти.
Россия президентининг матбуот котиби Дмитрий Песковнинг таъкидлашича, Москва фармкомпаниялар ва тадқиқот марказлари компьютерларига ким ҳужум қилиши мумкинлигини билмайди ва бу ишга умуман алоқаси йўқ. Лондоннинг хакерлик ҳужуми ҳақидаги айблови худди 2019 йилги сайловда Россиянинг аралашуви ҳақидаги айбловларига ўхшаб, қуруқ сафсатадан иборат, деди у.