Буюк Британия супермаркетлари газ нархининг кескин ошгани сабабли бир неча ҳафта мобайнида гўшт ва бошқа сарҳил маҳсулотлар тақчиллигига дуч келишлари мумкин.

АҚШ нинг Иллинойс штатида жойлашган CF Industries компанияси ўтган ҳафта табиий газ нархининг юқорилиги сабабли Буюк Британиядаги ўзининг иккита заводи фаолиятини номаълум муддатга тўхтатишини  маълум қилди.  

Европанинг ўғитлар ишлаб чиқарадиган яна бир  корхонаси - Yara (YARIY) компанияси газ нархининг рекорд даражага ошгани сабабли   Европада, жумладан Буюк Британиядаги заводда аммиак ишлаб чиқариш ҳажмини  қарийб 40%га  қисқартиради.  

Британия чакана савдо консорциуми Буюк Британия ҳукуматини озиқ-овқат маҳсулотлари ишлаб чиқарувчиларини етарли газ билан таъминлашга  чақирди.  

S&P Global Platts компаниясининг маълум қилишича, Британияда  сентябрь ойида табиий газ нархи йил бўйича ҳисобланганда 420% ошди. Шунингдек, газ заҳираларининг тугаши,  суюлтирилган газ  учун Осиё билан рақобат қилиш ва Россиядан газ етказиб беришнинг камлиги  сабабли газ нархи Европанинг бошқа мамлакатларида ҳам  кескин ошмоқда.  

gulru сайти материаллари асосида

Гулруҳ Абдуллаева тайёрлади, ЎзА