Бухорода “CNH Industrial” компаниясининг ҳудудлараро марказий омборхонасининг очилиш маросими бўлиб ўтди.
Тадбирда “CNH Industrial” компаниясининг EMEA (Европа Яқин Шарқ, Африка, Россия, Туркия, Ўрта Осиё ва Покистон) минтақаси Президенти Карло Альберто Систо, компаниянинг шу минтақа бўйича бизнес директори Винцент Де Лазанья, “Ўзагролизинг” акционерлик жамияти бош директори Нодир Отажонов, “ЎЗКЕЙССЕРВИС” қўшма корхонаси бош директори Зафар Алимов, Бухоро вилояти ҳокими Ботир Зарипов, вилоят ҳокимлиги мутасаддилари, пахта-тўқимачилик кластерлари раҳбарлари, туман ҳокимларининг қишлоқ хўжалиги масалалари бўйича ўринбосарлари, туманлар агросервис МТП масъуллари, илғор фермерлар қатнашди.
Таъкидланганидек, техника – деҳқоннинг қаноти. Бугунги мураккаб шароитда озиқ-овқат хавфсизлигини таъминлаш мақсадида ҳам қишлоқ хўжалигида иш қизғин, бунинг учун эса албатта техника зарур. Президентимиз томонидан қишлоқ хўжалиги ерларидан самарали фойдаланиш, бир қарич ерни ҳам увол қилмасдан фойдаланиш, экин экиш, ҳосил олиш борасида қатор қарор ва фармонлар имзоланмоқда. Албатта, буларнинг барчаси мамлакатимиз аҳолисини сифатли озиқ-овқат маҳсулотлари билан таъминлаш, қишлоқ хўжалиги маҳсулотлари етишмаслигининг олдини олишга қаратилган.
Иш унумдорлигини ошириш, тез ва сифатли агротехник тадбирларни амалга ошириш учун эса қишлоқ хўжалиги техникалари сув ва ҳаводек зарур. Қўл меҳнати ёрдамида кўп вақт талаб этиладиган ишларни техника ёрдамида бир неча соатларда амалга ошириш мумкин.
Юртимизда узоқ йиллардан буён самарали фаолият кўрсатиб келаётган “ЎЗКЕЙССЕРВИС” қўшма корхонасида техникалар хариди учун шартнома тузишдан бошлаб то уни етказиб беришгача бўлган жараёнлар янги босқичга олиб чиқилди. Аввалгидек, кутишлар, техникани олиб кетиш учун узоқдан йўл босиб келишга барҳам берилди ва бу орқали мижозларга кенг имкониятлар яратилди, коррупцион ҳолатларга чек қўйилди.
Тадбирда “CNH Industrial” компанияси билан ҳамкорлик масалалари хусусида ҳам сўз борди.
Маълумот учун, “CNH Industrial” – бу қишлоқ хўжалиги ускуналари қурилиш техникаси, юк автомобиллари, автобуслар ва бошқа транспорт воситалари, шунингдек саноат ва денгиз учун мўлжалланган куч агрегатларини ишлаб чиқарувчи 12 та глобал брендни бирлаштирган йирик саноат корхонаси ҳисобланади. Компания саноатда ва денгизда қўллаш учун куч агрегатларини (FPT Industrial) лойиҳалаштиради, ишлаб чиқаради ва сотади.
Ҳозирги пайтда “CNH Industrial” компаниясининг 66 та ишлаб чиқариш корхонасида ва 54 та илмий-тадқиқот марказида 64 мингдан ортиқ киши меҳнат қилади. Компания ўз ишлаб чиқариш тижорат фаолиятини 180 та мамлакатда тақдим этади.
У дунёнинг барча асосий бозорларида иштирок этган ҳолда, ўз компанияси фаолиятини Марказий Осиё минтақаси, жумладан, Ўзбекистонда кенгайтиришга эътибор қаратмоқда.
Хусусан, “CNH Industrial” компанияси билан ҳамкорликда Ўзбекистонда ўрим-йиғим, мелиорация ва йўл қурилишида қўлланиладиган, газда ишлайдиган замонавий қишлоқ хўжалиги техникалари ишлаб чиқаришни ташкил этиш масалалари эътибор марказида бўлиб турибди.
Йиғилганлар “CNH Industrial” компаниясининг ҳудудлараро марказий омборхонасини биноси билан танишди. Фермер хўжаликлари раҳбарларига юқори унумли техникалар топширилди.
Бундан ташқари, компания вакиллари Бухоро табиий ресурсларни бошқариш институтида ҳам бўлиб, бу ерда “ЎЗКЕЙССЕРВИС” қўшма корхонаси билан ҳамкорликда тайёрланган замонавий ўқув амалиёт хоналари ва сервис майдончаларини ҳам кўрди.
Зариф Комилов, ЎзА