Ўзбекистон Республикаси Президенти “Бухоро вилоятида кичик ва ўрта бизнесни қўллаб-қувватлаш, хизмат кўрсатиш ва туризмни ривожлантиришнинг қўшимча чора-тадбирлари тўғрисида” қарор қабул қилди.

Унга мувофиқ, Бухоро вилоятида тадбиркорлик субъектлари учун инфратузилмани яхшилаш, туризм хизматларини янада кенгайтириш, аҳоли даромадларини ошириш ва бандлигини таъминлаш учун тадбиркорлик фаолиятини молиявий қўллаб-қувватлаш мақсадида икки йиллик имтиёзли давр билан 5 йил муддатга 100 миллион АҚШ доллари миқдорида фоизсиз кредит ажратилади. 

Маблағлар Иқтисодиёт ва молия вазирлиги томонидан қуйидаги шартларда ажратилади:

оилавий тадбиркорликни ривожлантириш дастурлари, шунингдек, Ўзбекистон Республикаси Президентининг 2023 йил 10 ноябрдаги ПФ-193-сон Фармони ва 2023 йил 14 сентябрдаги ПҚ-306-сон қарорида белгиланган тартиб ва механизмлар асосида кичик ва ўрта бизнес, хизмат кўрсатиш ва туризм лойиҳаларини молиявий қўллаб-қувватлаш учун тижорат банклари ва "Тадбиркорликни ривожлантириш компанияси" АЖга икки йиллик имтиёзли давр билан 5 йил муддатга фоизсиз 60 миллион АҚШ доллари миқдоридаги маблағлар;

Бухоро вилояти хркимлигининг асослантирилган ҳисоб-китобларига мувофиқ, инфратузилма лойиҳаларини молиялаштириш учун икки йиллик имтиёзли давр билан 5 йил муддатга фоизсиз 40 миллион АҚШ доллари миқёсидаги бюджет ссудаси.

Қарор билан:

Бухоро вилояти туман (шаҳар)ларининг архитектура қиёфасини яхшилаш, аҳоли, тадбиркорлар ва сайёҳларга қулай шароитлар яратиш учун ишлаб чиқиладиган мастер-режалар рўйхати;

Бухоро вилоятининг туман (шаҳар)ларида туризм, кўнгилочар, гастрономик, савдо ва сервис фаолиятини ривожлантириш мақсадида ташкил қилинадиган туну кун фаолият кўрсатадиган кўчалар рўйхати;

Бухоро вилоятининг туман (шаҳар)ларини ихтисослаштириш ҳамда унга асосан уларнинг "ўсиш нуқта"лари (драйверлари)ни ривожлантириш йўналишлари тасдиқланди.

ЎзА