Бухоро вилояти Вобкент туманидаги “Lux Pet Plast” масъулияти чекланган жамияти маҳсулотлари харидорларга манзур бўлмоқда.
Корхона умумий қиймати 6,7 миллиард сўмни ташкил этади. Шундан 5,5 миллиард сўми тадбиркорнинг ўз маблағи, 107 минг АҚШ долларини хорижий кредит линияси ташкил этади. Бу ерда турли ўлчамдаги пластмасса идишлари ишлаб чиқарилмоқда.
–Туман марказига яқин маҳалланинг Бинокор кўчасидан қарийб 70 сотих қаровсиз ётган ер майдонини олиб, 2020 йилдан цех қурилишини бошлаганмиз, – дейди корхона раҳбари Адҳам Илёсов. – Бино қурилгач Туркия ва Хитойнинг махсус термопласт ускуна ва қолиплари билан жиҳозланди. Бунинг учун “Капиталбанк”нинг вилоят филиалидан биринчи босқичда 300 минг АҚШ долларига тенг кредит маблағи расмийлаштирганмиз.
Ҳозирда мазкур корхонага Хитой давлатидан умумий қиймати 1 миллион АҚШ долларини ташкил этган махсус дастгоҳ ва ускуналар келтириб ўрнатилган. Елим идиш, яъни ПЭТ капсула ишлаб чиқариш линияси турли ичимликлар ва маиший-кимёвий моддаларни қадоқлаш учун ишлатилади. Айни пайтда, қадоқнинг бу тури бошқа турдаги қадоқлар орасида етакчи ҳисобланади ва бир қанча афзалликларга эга: шиша билан ташқи ўхшашлик, герметик винт қопқоқ билан ёпиш имконияти, синмайдиган ва етарлича мустаҳкам материал.
****
Бухоро вилояти божхона бошқармасининг Олот чегара божхона пости орқали ҳужжатларда кўрсатилмаган мўйналарни олиб ўтишга бўлган уриниш бартараф этилди.
Хорижий йўналишда ҳаракатланиб келган юк автомашинаси “Олот” чегара божхона постида дастлабки божхона назоратидан ўтказилади. Натижада импорт тариқасида олиб келинган товарларнинг инспекцион кўрик мажмуасидан олинган рентген тасвирлари ва юк кузатув ҳужжатларида аниқланган тафовут божхона кўригидан ўтказиш лозимлигини кўрсатади.
Маълум бўлишича, божхона юк декларациясида бошқа ном остида кўрсатилган товарлар аслида 1 310 дона қора рангли “ишлов берилган мўйна” эканлиги аниқланади.
Ҳозирда умумий қиймати 159 миллион сўмни ташкил этувчи мўйналар ҳолатга ойдинлик киритилгунга қадар вақтинча сақловга олинди.
Зариф Комилов,
ЎзА мухбири